Oté

Si ni bouj pa plis, nou lé fouti !

Justin / 24 avril 2015

Na poin lontan promyé minis l’Inn la parti dan La frans épi li la di konmsa : « Li la domann bann jenn son péi, travay dir l’ékol, gingn gro-gro diplom épi gran-gran kapasité, konmsa kan bann zéropéin sar tro vyé épi nora pi dmoun kalifyé shé zot, bann z’indien v’alé pran la plas ». Moin pèrsonèl, mi la trouv son parol in pé for sirtou kan ou lé dann in péi éropéin, k’i akèy aou… Lé étonan mé bann gouvèrnman La Frans la pa di arien, la pa fé, kansréti, in protéstasyon konm ki diré zot osi zot i pans lo promyé minis indien na rézon koz konmsa. Sé moin k’i kroi sa é mi donn azot mon santiman.

Na poin lontan moin la lir dann in zournal Moris, gouvèrnman morisien l’apré ankouraj son bann jenn pou avansé dann la guèr pou la konésans, konmsa, dann l’oséan indien sé zot nora tout lo moun lo pli konpétan é zot sar an avans dsi lé z’ot péi l’oséan indien, an avans par rapor bann rényoné, an avans par rapor bann malgash épi par rapor bann péi afrikin. Zot i sava fé in vilaz pou komiknik la konésans lo pli o nivo ké nana. Pèrsone La Rényon la pa di arien, la pa lèv lo pti doi konmsi par avans nou lété déza bati mèm arshi bati. d’apré sak moin la konpri, bann jenn rényoné nora lo droi vnir dann lo vilaz, sirtou pou zot pèy in bon moné, kisoi zot prop larzan, kisoi la bours gouvèrnman fransé.

Par l’fète lé pa pou étone amoin pars zot i koné nana plis san sèz mil pèrsone iilétré isi La Rényon. Pars bann tèst pou marmay lékol lé pa bon ditou : i parétré noré par-la o moins la moityé bann klass, bann zélèv lé pa o nivo d’zot klas. arzout èk sa sak é o nivo, i rèv arienk in n’afèr sé d’alé fé z’ot shomin dann l’Erop… Donk kan Madégaskar va dékolé, lé riskab ké nou va dobout guète. Kan bann zéropéin va viéyi sar parèy galman. Pétète mèm bann jenn morisien va vni isi po dirij anou. Si ni bouj pa, na in drol de sor k’i atann anou. Si ni bouj pa plis, ébin nou lé fouti.


Kanalreunion.com