Oté

Si ni fé lé shoz konm k’i fo, mi pans manzé i mank ar pa nou !

Justin / 4 mé 2016

Pou sak i lir mon modékri, mi pans zot sar pa étoné si mi di azot moin nana konm in l’idé fiks la sékirité alimantèr pou nout péi. Pars sa sépou moi in problèm : mi domann amoin si dann l’avnir bann rényoné va gingn manz vant plin, sansa si zot i vien-ar pa bou. Lé vré ké sa sé in késtyon i fatig la tète bann rényoné konm demoun tout péi la soufèr la fain.

Na dé-troi soir moin la avèy in l’émisyon dsi télé kréol édann so l’émisyon-la moin la antann dé-troi pèrsone kozé é fransh vérité sak bann a téi di lété intérésan é lo l’émisyon té bien améné. Momandoné na inn la di, dann tan la gèr, la Rényon lété i fé pi komèrs avèk bann péi déor é li la viv dann l’otarsi é lo moune té apré domandé si zordi nout péi i pé pa sifir pou nouri son popilasyon.

Moin pèrsonèl moin lé dakor avèk sa par raport tout bann nouvo manyèr nana pou dévlop l’agrikiltir é an plis produi bann manjé i anpoizone pa nout kor firamézir : l’agroforèteri sa i égzis ! La prodiksyon bio, sa i égzis ! La pèrmakiltir i égzis osi ! L’élvaz sa i pé fé gaman é bien siouplé.

Donk dann mon kèr, mi di si ni fé lé shoz konm k’i fo, mi pans manzé i mank ar pa nou domin.


Kanalreunion.com