Oté

Si ni vé, nout l’avnir i pé èt in bon l’avnir

Justin / 2 mars 2012

Mèrkrodi soir, l’avé in sobatkoz dsi Rényon Promyèr. In déba té i rosanm malérèzman sak la fé l’ané 2009. Parèy ankor sak la fé avan sa kan mouvman Fridom la pété. La prèv ké bann problèm sosyal lé touzour la, mèm si désèrtin la vni pli grav ankor. Mé lo bann kozman lété parèy, konmsi Kréol i tourn an ron... konm i di défoi, sèrpan i mord son ké. I di sa kan nana in bann problèm konpliké, anmayé l’inn avèk l’ot, é demoun i oi pi la finisyon.

Lé posib moin la pa ékout tout, boutanbout. Lé posib galman moin la fé inn-dé pti somèy lyèv dann milyé lo sobatkoz. Mé, sanm pou moin, moin la pa antann tro parl dévlopman. Touléka, lo mo la pa sort souvan. La parl la vi shèr. la parl travay i mank. La parl formasyon. Mé dévlopman, moin la pa antann, é moin té pa sir bann moun té la l’avé anvi parl de sa. Poitan, konm di lo kont, dévlopman, sa poto mitan in sosyété. Sé li la klé k’i rouv la port l’avnir in péi, ou sinonsa in réjyon. Na in filozof i apèl Nietzche té i di, l’onm sé in z’animo kréatif, vik li nyabou rann lo fitir prézan.

Si ni pans nout fitir sé lo dévlopman, mi pans na poin arien pli présé ké mèt anlèr lo dévlopman nout péi, anparl de sa, fé lo plan pou sa, pars moin lé sir, na poin in méyèr manyèr viv dan lo prézan ké prépar l’avnir... Nout l’avnir i pé èt in bon l’avnir si ni vé épi si ni gingn démont tout bann lanspèk i anpèsh anou avansé.

NB : Lé vré, lé pa fasil nyabou plas son dé mo dann in walali-walalo konm la fé dann télé, sof si ou la prépar inn-dé dévlopman, donk mi domann par avans éskiz bann sobatèr si mon kritik lé tro dir.

 Justin 


Kanalreunion.com