Oté

Si ou i déklansh lo van, ou i ramas la tanpète !

Justin / 3 zwin 2016

In foi anplis, somenn isi l’aktyalité i donn rézon nout provèrb : ni pé ankor in kou parl bann z’il komor épi Mayotte. Alon pran légzanp in moun, i égzis pa, mé i pé égzisté ; sirtou dann lo tan k’i kour. Apèl ali konm zot i vé, moin pou mon par m’apèl ali Abdallah. Kisa i lé Abdallah, sansa kisa li pé ète :

Kan la fé lo zé dé z’il, Abdallah té isi La Rényon. Li la vi bann maoré, shant la marséyèz épi roul azot dann drapo troi koulèr. Pou son par, li la ramas in kou poignar dann kèr ou son péi. Li la antrenn dopi étan pti é li té kontan partisip in gran konpétisyon mé la shyass nana gro vant é son l’ékip i partisip pa pars zot i pans la insilt z’ot péi. Zot i oi osi bonpé rényoné é mèm in minis La frans pran pozisyon kont zot. Aprésa, li aprann ké son péi lé mèm pa shoizi pou lo zé dé z’il a vnir mèm ké lété son tour. Li na plin z’ami i sava dann koisa-koisa épi tazantan li aprann bato la kapoté é lo moun la noiyé : kon bien z’ami, famiy, kamarad la fine noiyé dann so gran lo la ?

Mé dann son péi nana la télé, é nana sirtou internet, é dsi internet li pé antann parl lo djihad, li pé antann parl a guèr sint, li pé aprofondi in pé son konésans dann la rolijyon bann mizilman. Li pran kontak avèk demoun la parti fé la ghèr é li apran pa an avoir pèr la mor. Donk ala li lé pli for ké tout sak la mépriz ali ziska zordi é ala ké sé li k’i fé pèr banna é li pé rèv in sèl z’afèr sé mor an martir.

Kosa v’arivé, l’istoir i di pa ankor. Mé l’istoir i rapèl anou in n’afèr : « Si ou i déklansh lo van, ou i ramas la tanpète ! ». Obli pa sa é sirtou arète, si i ging, ankor, zoué avèk do fé !


Kanalreunion.com