Oté

Si ou i krash anlèr, lé riskab artonm dsi out bout né !

Témoignages.re / 8 novanm 2013

Zot i koné Tokyo ? Mi pans ke oui ! Tokyo-là, sa la kapital péi Zapon. Mé o fèt, pou kosa mi parl Tokyo ? Pars la-bà la shésrès i tap for : la shésrès-li, la shalèr-li. Konm di lo kont, la shalèr i donn si tèlman k’i fé konm i kanikil, é demoun i mor a fors lo fé sho… Pou kosa mi parl de sa ? Pars isi osi, mé Moris galman épi d’ot zandroi na in défisit la pli inkroiyab… Bin, d’apré zot, kosa bann Zaponé la fé ? Figuir azot, i paré zot la mèt an marsh dé mashine pou fé la pli na déza plis sinkant-an.

Mi pans in pé l’apré majine moin l’apré kas ti boi. Poitan non ! I égzis bann mashine pou fé la pli. Mi sava pa dékri sa an lon-an larz, mé d’apré sak moin la antandi dir, i bonbard bann niyaz débitan èk in produi shimik — l’iodir d’arzan — é bann pti gout i transform an gro gout épi la pli i tonm. Figuir azot, d’si Tokyo la tonm disèt milimèt la pli, donk in bon n’afèr, mé moin lé pa sir ké sé lo mashine la donn in rézilta parèy. Dizon ! Mé kroi pa sa la pa danzéré ! Pa tèlman pou lo produi shimik, mé pars sa i pé donn in bann katastrof natirèl : la pli i tonm an gran kantité épi i fé linondasyon, i noiy demoun, i kas bann kaz... kaziman konm bann siklone de lo ni koné bien La Rényon.

Zot i pans nou lé an rotar la d’si zot ? Détronp azot ! Mi souvyin lo prèt la fé novène pou domann bondyé pou fé tonm la pli. Mi koné pa si i fé ankor zafèr konm sa koméla, mé lontan oui. Par l’fèt, mi souvyin pi di rézilta. Myé k’sa, kan moin lété lékol primèr, konm la di dann radyo Sin-Dni, l’aviyon Samat i sava bonbard niyaz pou fé tonm la pli, la métrès la fé sort tout marmay dan la kour pou agard lo léspéryans é oir la pli tonbé. Nou la vi l’aviyon apré rondé-rondé, mé nou la pa vi la pli, i paré la pli la tonm an mèr.

Boudikont, mi trouv lé pli préférab plant pyé d’boi, armas de lo kan la pli i tonm, évit lo gaspiyaz... sirtou répar bann tiyo i lès la moityé d’lo koul a tèr. Sirtou ramas tousa d’lo i tonm dan la mèr la-bà Sint-Roz. Mi pans i vo myé évit fé lo sorsyé, pars konm i di souvan, si ou i krash anlèr, lé riskab artonm dsi out bout né.

NB : In nouvèl pou fini : i paré bann katastrof natirèl, in pé lé pa si natirèl ké sa, in pé sé lo rézilta la kouyonis demoun épi lo malfondé bann sèrvis ségré.

 Justin 


Kanalreunion.com