Oté

Si ou i krash anlèr,
lé riskab i rotonm dsi out né !

Justin / 10 juillet 2012

Dopi 2010, kan Didier la gingn prézidan la Réjyon, li la fé koudéta dsi koudéta. Zot i souvien koman li la fé dégaj madam Dindar konm prézidant la sosyété k’i finans la konpagni. Lé vré, èl té prézidant, pars Paul Vergès té préfèr partaz bann résponsabilité. Kisa la di nout kamarad lété vé pa bann fanm i partaz lo pouvoir ? Ankor in l’égzanp... Aprésa, mésyé Didier la fé débark Paul Vergès, épi Gérard Ethève. Bann gran journal, bann télé la kont lo kou. In nouvèl éstra konm sa té i kontant azot bien. Mèm bann pti z’aksyonèr i diré té fyèr d’sa. Mèm lo pèrsonèl la konpagni la pa tir moushoir. Mèm Téophane Narayanin té kontan.

L’èr-la, la done lo pouvoir bann anti-Rényoné, la plipar d’tan bann moun Er-Frans l’avé touzour pran Er-Ostral konm l’ènmi. Arzout èk sa, par kou d’shans, la konpagni té an difikilté, pa plis k’ER-Frans, pa plis k’Er-Morice, pa plis ké bonpé konpagni, mé té in bon l’okazyon pou dénons bann mové zéstyonèr ; L’èr-la, mésyé Didier la di li sa rodrès la sityasion, li sava rokapitalizé. Sosyété li lé prézidan i sava amèn soisant-sis milyon l’ero. Si i fo, i fo ! Mé mésyé Didier, sa in bon z’érityé Sarkozy, é la pa arienk sa li la désidé. Li la désid galman done in kou l’akordéon. Koman i fé sa ? Lé sinp, i désid diminyé la valèr lo l’aksyon, dopi kat-san sinkant éro ziska vin éro solman. Pou kosa ? Konmsa bann salaryé l’avé trèz pou san z’aksyon i rès azot in pti bout la. Parèy pou bann pti z’aksyonèr ; Parèy pou Narayanin. Vote aou pour, vote aou kont, sa i ansèrv de riyin.

Sa i fé don sa ? I fé pa si ou i apèl Paul Vergès, mé si ou i apèl Didier Robert, ou i pé fé tout sak ou i vé. L’opinion piblik ? I kas pa tro la tèt. Bann salaryé ? Konm di lo kont, zot ba la lèn, la vid in sèl kou. La moral dann z’istoir-la ? Sé zistoman ké la poinn moral. In pé i artrouv azot dsi la plime san savoir par koman. Na in provèrb kréol i di konmsa, si ou i marsh tèt an l’èr, ou lé riskab marsh dann kékshoz pa bon. Na in n’ot i di : « Si ou i krash anlèr, lé riskab artonm dsi out bout né ! ».

Justin


Kanalreunion.com