Oté

« Si ou lé pa sir rékolt mir, dé myé ou i manj o pyé ! » – In kozman pou la rout

Georges Gauvin / 29 zwiyé 2015

Kosa sa i vé dir, sans prop ? Zot i koné bien koméla nana moush i atak lo frui. Kan lo frui i doizète mir sé l’èr ké li la fine gaté. Si ou i pé manj ali vèr ! Konm mang. O sinonsa jone ! Konm gouyav. I vo myé ou i manj ali jone sansa vèr… si ou na vréman lo krintiv pa manj ali kan li sar mir.

Sans figiré ? Mazine in kou ou i travay pou in patron mové péyèr. Ou i pé domann in l’avans tazantan. Si i vé pa donn aou, ou i larg lo z’afèr an plas. Si i donn aou, l’èr-la ou i manj o pyé. Konmsa, konm di lo kont, ou i fé pa raz aou san savon.

Kosa ou i anpans ? Arien ditou ? Fé travay out koko ! Fé bouy out matyèr griz ! Ou va oir, rant-rant, si ni tonm pa tazantan dakor rantre nou.


Kanalreunion.com