Oté

Si oui atann la pli, po plant out mayi, ou fra pi arien !

Justin / 10 avril 2014

Zot i koné in parol maloya din maloyèr sélèb i di konm sa : « sa la météo lé lotèr la météo ! »
Mi di in boug i pas : « moin lapré plant mon mayi… pito : li di a moin : « alor koué ti fé, ti mè prop ? »-non mi di a li : « mi plant mon mayi, mi éspèr la pli va tonbé », parlfèt lo tan lé gri po vréman ; sa fé dé troi zour radio i anons fron froi, sanzman dtan, prépar ti kouvertir ; la pli i sar tonbé alors i di a toué si louest, lo sid, lést, tout koté minm la oul i anons 7 mèt…
Sazès popilèr : « si oui atann la pli la oui pé atann lontan minm, ti fra pi arien a fors atann la pli7.

An fèt, mi devé pa plant koméla mon mayi ; mé moin lavé mèt lo dé troi zépi dann in sak ; lot zour mi rouv in kou, bann zépi la la fini zermé : oté baya bé mi di ; la i fo fouy vit lo trou, fout dan ék in pé la sann ék inn ti pé fimié-fimié kabri moin nana po rovann.
La sann kas pa la tèt kan mi défris, mi bril lo boi sèk konm lo boi ver- dayèr, mi koné pi si sa lé bon po la kous dozone ; koué mi sar fé ék tout mon bann brans moin la fine koupé ék la as ! Moin lavé fé in linvestisman tronsonéz ; li la koup mon zenou, donk la dékouraz a moin (si poin d sutur) !

Lo zanbrovat osi, i sort dann konzélatèr mon kamarad zano ; la fini moizi ; mi ardmann a li dot ; mi di a li mon bann trou la fini paré.
Rézman mon kopine na vouèm sék ; donn dé gous po la semans.
Dé zour la plant zanbrovat ; lo vouém la ginye dé ranzé ; oté i mank a moin dé troi grin dpoi, zantak, ou sinon zariko, zot la poin po done a moin ?
Si oui atann la pli po planté ou kab atann lontan !?

 Justin 


Kanalreunion.com