Oté

Si par malèr i ardone ali in nouvo manda…

Justin / 19 avril 2012

Matant Zélida la ékrir Justin :
Mon shèr nové, mon spès salté,
Mi konpran pa sak zot i vé, zot bann rouj-de-fon. Zot i di zot lé pou l’otonomi dan l’énèrji... dizon lé vré. Solman moin la bien ékout lo pti prézidan kan li la vni La Rényon, é mi pans sé li k’té lo pli klèr. Dopi l’tan li lété minis l’Intéryèr, li la di é li la rodi, sa sé in bon n’afèr pou nout départman. Lé z’ot, mi trouv zot la kafouy in pé é moin na konm l’inprésyon zot i fé plis konfyans l’EDF ké bann Rényoné. An gro, m’a dir aou, sanm pou moin, promès Hollande la fé azot sé konm k’i diré in promès soular. In soular i di, li boir pi, li boir pi, mé kan li la fine désoulé, li la fine obli son promès... li arkomans éponj l’alkol. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Ou i parl l’onènté, la sinsérité, mé zistoman, na poin marshann parol konm lo pti prézidan ; Li di li lé pou l’otonomi dan l’énèrji, mé li sé lo promyé pou bat atèr bann z’énèrzi ronouvlab. La prèv ? Li la mèt dsi la paye in bann l’antropriz i travay dann solèr. Lo tram-trin té in bon n’afèr, mé son gouvèrnman la sabot sa èk Didier Robert, mèm konplis. Final de kont, li manti pa arienk kan li fé promès bann rish : la, li lé paré pou doné, doné, done ankor, sof k’isort pa dan son posh. Mé si in n’afèr lé bon pou nou, li anvoy dingué. Li lé konmsa, é méfy aou si li di li okip out ka, out kanar lé noir. Konmsa mèm li la fé pandan sink-an, é li lé paré pou rokomansé si demoun, par malèr, i ardone ali in manda prézidan. Tok ! Pran sa pou ou !

 Justin


Kanalreunion.com