Oté

Si sé arienk pou désalé, la pa bézoin anvoy bann éstazyèr dan La Frans !

Justin / 21 out 2014

Matant Zélida la ékrir Justin :

Mon shèr nové, mon spès salté, rouj de fon dovan l’éternité,
Vi koné la rantré i tard pa arivé, isi konm la-ba dann la métropol. Vi koné osi nana in bann amontrèr lékol i sort ariv La Rényon ? Mèrsi la métropol pou donn l’instriksion bann znfan La Rényon ! Vi koné osi nan par-la soisann troi profésèr stajyèr lokal la parti fé zot éstaz dan la métropol. Mèrsi la métropol pou bien okip la formasyon nout zénès ! Mi san out ti pé d’san apré bouyi, mé mi konpran pa pou kosa. Pars si bann zènn métro i vien isi pou travay, sé zot droi : zot lé fransé kant mèm, épi zot na déza in parkour donk zot v’amenn isi zot konésans, zot rouvèrtir léspri. Pou lo bann éstajyèr lokal, mi pans sar myé pou zot vi k’va rouvèr in pé zot léspri, zot kiltir épi zot va sort in pé dann la jip zot momon. Mi pans sa va fèr azot di bien ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Moin té sir ou té i sava ékrir amoin in n’afèr konmsa, pars vi koné moin lé pa dakor ditou sanm sak ou i ékri. Pou komansé, mi pans mon parti na rézon kan li domann in moratoir pou bann jenn rényoné na zot diplom l’inivèrsité-dizon zot lo mastèr- pou aprann lo métyé d’amontrèr isi. Mi kroi zot i pé bien aprann métyé-la provi k’zot lé bien suivi, épi zot na kouraj, épi zot i désid fé avèk kèr so métyé d’amontrèr. Konm k’i di, lo pli bo métyé nana dsi la tèr. Donk la pa bézoin fé l’inportation bann z’amontrèr konm i fé shak ané...Par l’fète si mi tronp pa, Maurice laba, bann profésèr lé morisien é moin la zamé tro antann bann morisien i réklam bann profésèr anglé an gran kantité...
Aprésa pou bann éstajyèr La Rényon, mi pans pa, si zot i vé alé déor pou amélyor azot l’androi zot i doi alé sé dan La Frans, pars an Erop nana in bonpé péi l’amontraj lé méyèr ké dan La Frans-zistoman l’OCDE i sort pibliy son klasman ébin sète La Frans la pa amélyoré !-. Dabor pou kosa i fors azot alé ? Isi i gingn pa bien aprann lo métyé d’amontrèr ? Mi pans pa ké zot va myé aprann laba... Lo voiyaz i form la zénès, sa lé vré, mé la pa arienk lo voiyaz dan La Frans é si sé arienk pou zot désalé, mi pans pa na solman l’éstaz dan La Frans pou désal azot konm k’i fo. Tok ! Pran sa pou ou !

Justin

NB Par l’fète mi sort antann dann télé lo bann éstaz lé tèlman bien roganizé dan La Frans ké dann sèrtin l’androi bann éstazyèr lé dann dé Lisé an mèm tan, a plis san kilomète inn dé l’ot. Ou i parl d’in kastèt pou zot ! Moin la vi galmn dann zournal in jenn rényoné l’avé poin larjan pou alé dan La Frans é demoun té blijé domann siouplé pou li. In bon léspèryans an vérité !


Kanalreunion.com