Oté

… Si solman l’avé pa kass la MCUR

Justin / 9 zwin 2016

Avan-yèr soir dann in télé, moin a vi in roportaz dsi Cuba é fransh vérité sa la intérès amoin pou vréman. Dann fime-la téi parl tout sak lo gouvèrnman lo péi i fé dopi in kantité d’ané dann domène lo patrimoine matéryèl lo péi. I fo dir in bonpé moniman, in bonpé batiman, in bonpé pratik kiltirèl épi inn-dé site natirèl la gingn in klasman par l’unesco konm nout Maloya, épi lé o nout péi La Rényon.

Mi sava pa parl tout sak la amontré dann mon pti ribrik tou lé zour mé mi vé koz dsi inn-dé z’afèr la bien ral amoin konm k’i di :

— Inn, dann la plipar bann grann vil lo gouvèrnman la fé tout sak té an son pouvoir pou réstor lo bann moniman : kisoi bann z’otèl partikilyé, kisoi lé foiyé bann roljyèz, é kan la gèr la détrui bann gran batiman la fé tout pou arkontruir ali konm li l’été avan la révolisyon-avan l’ané 1959. In romark : la révolisyon kibène la pa rouv la port pou bann barbar kass tousa-la.

— Dézyèm z’afèr, moin la vi bann kibin i fé dann la kapital La Havane : zot i déplas l’ékol ziska dann mizé é zot la romarké bann marmaye i aprann myé l’ékol kan zot lé antouré par bann éstati, bann pintir épi bann dokiman z’arsiv konm koi l’ansègnman lé pa néglijé dann péi-la..

— Nana in n’ot afèr la toush amoin pou vréman. Zot i koné Cuba sé in gran péi pou la prodiksyon bann sigar. Moin la vi ké dann in fabrik sigar - a la min siouplé - nana in ga - lo léktèr - i vien avèk in liv épi bann zournal é pandan ké bann z’ouvriyèr l’apré travaye lo ga, déyèr son mikro i lir nouvèl dann zournal épi bann roman épi bann nouvèl, in pé tout pé.

L’èr-la, moin la pans kèl gran sèrvis la MCUR nora rann nout z’étidyan, nout liséin, nout koléjien épi marmaye l’ékol pou konm i di bien kiltiv azot épi marsh pli rapidman dann shomin la konésans… Si solman in pé l’avé été asé intélijan pou kontinyé lo prozé é pa kass ali konm la fé.


Kanalreunion.com