Oté

Si tou l’moun i rézone konm tanbour !

Justin / 11 out 2010

Matante Zélida la ékrir Justin :
Mon shèr nové, mon spèss salté,
Bann rouj-de-fon la p’assé fatig nout tète avèk l’éshofmann klima ? La p’assé prann azot pou l’bondyeu ? Toute fason, mi pans pa k’zot i pé prévoir la finn lo monn. Sak i doi arivé v’arivé, ké zot i vé, ké zot vé pa… épi lèss in pé bann gran péi kozé ! Nou bann ti, nou n’a aryink pou fèrm nout také. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Si ni anparl l’éshofmann klima, sé pars sé lo pli grav problèm la tèr na pou fèr fas. Si klima i éshof, nivo la mèr va monté. Si nivo la mèr i monte, bann péi plate sar rokouvèr avèk dolo. Si lo bann péi plate lé rokouvèr avèk la mèr, bann moun i rèss la sar blizé rode in plass pou alé. Zot sar in bann réfijyé klimatik, é bann péi o-sèk i rouv ar pa zot lé bra pars zot sar indézirab. Pou koué ni koz, pou koué ni rouv nout boush ? Pars lé ankor tan pou pran bann bon désizyon avan k’la katastrof i ariv. Èl lé pou arivé si toulmoun i rézone konm vou, si tou l’moun rézone konm tanbour.

Justin


Kanalreunion.com