Oté

Sians fiksyon ?

Justin / 10 séptanm 2013

Mi koné pa si zot i suiv in pé l’aktyalité ; sak i trakas a moin an se moman, sé lo risk la gèr an Siri.

Na in pé i di, poukoué nou sar rogard sak i spas dann péi loin, mé nou lé oblizé intérès a nou pars du plu loin o plu pré, i fini par touch a nou.

Sak na in sèrtin l’az i rapèl la gèr 39-45, isi La Rényon, navé pi linz, navé pi papié, dann magazin navé pi sapo ; konbyin i souvyin ankor la mèt rob goni, la ékri si fèy fig, la fé kapline dann z’èrb Sin-Pol ou sinon sa fèy vétivèr.

Zordi, si i pèt in gran tranbléman o Moiyin-Oryan, pétrol kab pi ariv l’Érop, pi ariv z’Étazuni ; bann gro bato i port pétrol pa rafiné dépi sid-èst aziatik i arivra minm pi l’Afrik di Sid, donk nout péi i poura pi roul an loto a koz dan bann l’éstasyon, nora pi l’ésans, nora pi lo gaz.

Zot i kroi nora ankor l’avyon ou d’ot bato marsandiz po aport po nou tout sak nou konsome ?

Po ashvé, zot i suiv konm moin : nout prézidan èk son minis z’Afèr étranzèr lé po anvoiy solda konbat Bashar-El-Assad ! Bann Ris lé pa dakor ; z’Alman non pli ; a nou La Rényon, a s’ki paré, nou lé Fransé, na z’intéré la Frans isi, donk nou nora z’ènmi kab bonbard a nou ; mi èspèr mi koz konm dann sians fiksyon !

Nou inport si tèlman tout sak nou manz, nout z’abi, nou arèt pa konsomé — anfin, sak nana — téléfone a li, télévizyon a li, tout kalité véikil, médikaman, l’angré, lo fèr ; mi arèt la lis, noré tro…

Sé la ki fodra trouv in ot manyèr viv ; souèt i ariv pa britalman ; nora maléré, plis ankor ké zordi.

Ankor inn foi, mi espèr mi fé pa sians fiksyon ! Koué zot i pans zot ?

Justin


Kanalreunion.com