Oté

Sifiré d’in zétinsèl, di pa in zour ?

Justin / 6 févrié 2016

Dopi dé zour tribinal la po zij in boug pou in nafèr éspésyal, boudikont lo boug la fé in gro lérèr, minm i pé di li la fé in bèl kouyonad, vik li la mèt do fé dann la foré la ba Maido. Kosa la pass par son tèt pou fé in nafèr konm sa ? Dizon in nafèr difisil pou konprann vik li minm li lé ponpié. Mandoné alé konprann ? Sak lé sir osi sék do fé i pran pli fasilman dan désertin zandrwa, zandra ousa néna la sésrèss, ousa néna bwa sèk, ousa néna zékli d’bwa, kopo d’bwa tousala.

Dopi sa an mwin minm mi di a mwin, la sé in boug la mèt do fé, lo pov. Mé sanm pou mwin do fé i pé pran ninport kèl moman isi la Rényon. Néna si tan tèlman linzistiss, di pa in zour nout gro kèr i lév pa ! Aforss tan rod travay, aforss tan i trouv pa di pa in zour bann zènn i krak pa in zalimèt ! Konbyin d’tan bann gramoun va siport viv èk in ti moné zako konm zordi ? Ziska kèl èr domoun sra éré viv an touk dann inn ti kaz ?

Antansyon mi zij pa lo boug la mèt do fé, néna d’moun lé péyé pou sa, mi ankouraz pa non pli domoun pou fé sa. Mé mi di antanvyon, vik dan nout péi néna tout zangrédian i trinn par isi par laba, donkalor ninport lakèl moman do fé i pé pran. Konm mi di la bon o, isi la Rényon, i sifiré d’in zétinsèl, bwa sèk néna, zékli bwa néna, kopo bwa néna é an plis domoun lé sèk. Sifiré d’in zétinsèl, di pa in zour ?


Kanalreunion.com