Oté

Siksé bann z’artis : Dis pou san l’inspirasyon, katrovin-dis pou san transpirasyon !

Justin / 13 novanm 2010

Mi pans, si zot lé konm moin, zot i èm sak i mète La Rényon anlèr, sak i mète nout péi an valèr. Si lé konm sa, mi pans zot la gingn kontantman dépi dé-troi somènn, kansréti, pou bann rékonpans nout bann z’artis la gingné dann péi déor. Kan in pé i anparl « kréol kaka », lé bon fé valoir gayar nou nana.

Pou komansé Danyèl Waro :
Nout l’anbassadèr lo maloya, d’apré sak moin la antann dir, la parti fé in gran tourné dann l’Europ. Pou mon par, moin la antann in bon l’émisyon déssi France-Inter épi moin la lir in gran lartik dann “L’Humanité-Dimansh”. Son titr : "Maloya, les entrailles de La Réunion". Anfin, mi sipoz zot la fine antann li la parti Copenhague, dann péi Danemark, pou in rékonpans inportan vi k’i konsidèr ali konm lo méyèr shantèr l’ané 2010. In rékonpans mérité, non ?*

I fo anparl ossi Kaf Malbar :
Tout demoun i èm nouvo mizik La Rényon i koné Kaf-Malbar. Sa in shantèr nana déza in bon léspéryans bann podiome épi bann diks. Li nana son bann z’admiratèr épi son bann z’admiratris, é lé mérité pars li la pa pran in shomin galizé pou li fé son mizik. Dizon li la tras li-mèm son séon. É bin, li la gingn promyé pri dann in fèstival mizik Caraïbe**. Lé valab non ?

San obli Groove Lélé :
Figuir azot, Groove Lélé li ossi la gingn in rékonpans dann féstival mizik Caraïbe. Li ossi li la pa rode in shomin fasil, mé li la nyabou ariv in bon rézilta. Byinsir, son famiy la pa n’inport ki, vi ksé la famiy défin Gramoun Lélé. Mé dé foi, lé byin difisil an avoir in léritaz konmsa sirtou avèk in gramoun l’avé si tan la pèrsonalité. Bon ! In bon boute shomin lé fine fé. Groove la fine fé dé shoz, é li na ankor dé shoz pou amontré !

Mi anparl aryink sak dizon lé dann l’aktyalité bann péi déor, mé bann z’artis La Rényon galman i arès pa lo bra kroizé, é zot na rézon pars na aryink sak i travay k’i réissi. Konm di lo patoi, lo talan sé dis pour san l’inspirasyon é katrovin-dis pou san transpirasyon.

Justin

* Prix Copenhague le 31/10/2010 lors de la rencontre des professionnels des musiques du monde (Whomex)
** Trophée des arts caribéens (Yaèl Trulès a également été nominée)


Kanalreunion.com