Oté

Sin-pyèr é Mikélon : kozé lé bon ! Kozé la boush rouvèr sirtou !

Justin / 26 désanm 2014

Zot i koné bann péi la zot ? Sa sé in pti péi fransé pa tro loinn lo Kanada. Fransoi Holland la parti laba pars d’apré sak li di, li la fé in promès par li mèm pou alé rann vizit bann péi l’outre-mèr. Promès parétil ! Mé nré myé vali li gingn tienbo d’ot promèrs par égzanp dsi lo rokil di shomaj. Mé sa la foiré sa !

Astèr na in n’ot promès k’i doi, sanm pou moin ète la promès tout prézidan é sète la i port dési lo dérèglomann lo klima… Ousa lo prézidan la parti li lé an plin dann la katastrof. Pou kosa ? Pars zot i koné pol nor i réshof é la glas i fonn. Pars zot I koné osi la glas dsi la préskil lo Groenland : moin la antann dir si la glas i fonn dsi péi-la, lo nivo la mèr lé riskab mont ziska sète mète an plis d’apré sak in pé i di, d‘ot i di in mète solman. Mi koné pa si lé vré, mé si lé vré, térin l’aviyon sar dann lo, lo sant médikal parèy. L’il lé riskab kass an troi antouré par la mèr. Si nana troi pti zil komn i sa fé pou pass inn pou alé l’ot, pass l’ot pou alé l’ot ankor. Dizon in kass tèt shinoi.

Mé bann l’administrasyon la di afol pa, inkyète pa solman zot i donn pa la popilasyon bann zétid la fini fé dsi la késtyon. Holland pou son par i fé diskour é li di va oir sa dann la konférans Pari. Va oir ? Koman va oir sa ? Sak lé riskab pèrd zot péi zot i oi pa lé shoz konmsa. Mé konm di lo kont kozé lé bon, kozé la boush rouvèr sirtou !

In kozman pou la rout : « Asé pass korona dsi l’moun ! Asé pass la pintir ! »


Zot i koné la pintir sa in n’afèr i kashyète lo trou dann mir, mèm la félir lo mir sa i gingn kamoufé. Sans prop ! Sans figuiré ? Pass la pintir sé rankont la manteri. La mantri, i mank pa dann dbann milyé ofisyèl. Mazine azot mèm ! Fé travay zot koko ! Fé bouy zot matyèr griz é zot va oir konm di nout zournal : « gouvèrné sé mantir ! »


Kanalreunion.com