Oté

Sink frui é légime par zour... sa lé pa bon pou toulmoun

Justin / 11 juillet 2011

Na dé-troi zour l’anons in drol de shoz dann gran télé la Frans. La di konmsa, in père d’famiy sis zanfan, son patron la lisansyé ali pars li té apré ramas bann frui épi bann légime dann késon déshé, akosté ansanm lo sipérète li té i travay. La anparl sa inn-dé foi, épi la pi anparl ditou, konm in kékshoz lé pa inportan, konm in pti péshé vényèl dann la patri lé droi de l’om.

Lo ga téi gingn lo smik, par-la mil éro épi mi sipoz son patron té i gingn in pé plis. Moin lé pré pou paryé avèk son larzan, li té i gingn pa ashté frui, épi légime. Mèm si la-ba lé moin shér k’issi, mé sa i apiy déssi lo bidjé d’moun, é kant out posh lé plate li lé plate mèm... Mi rogrète la pa fé in bon roportaz déssi li, déssi son famiy, koz èk demoun pou konète in pé plis lo fin mo.

Mé, konm in zour moin la antann in zournalis dir : « La pa bézoin fé plèr d’moun dann bann shomyèr ! ». Biensir la pa bézoin, mé sak moin lé sir sé kan lo boug l’ariv son kaz, é kan la li la rakont sa son madam épi son bann marmay, la pa rir soir-la dann son shomyèr. La pa bézoin fé plèr dann bann shomyèr mé i fé pa rir non pli. Kan ou i pans in pé i apèl sa in sosyété a vizaz umin, konm moin la antann dir pou bann péi l’Erop.

Mi pans lo ga la kalkil frui avèk légime sa lé bon pou son zanfan. Sink frui é légime par zour, sa lé bon ! Pa pou toulmoun touléka, pa pou sak na poin asiréman.

Justin


Kanalreunion.com