Oté

Sink zané, sa lé long é kourt an mèm tan !

LB / 18 juin 2013

Kan in réjyon nana sèt dépité, li pé gingn fé sansa défé in gouvèrnman. Li pé galman fé pass bann bon projé pou l’avnir lo pèp zot androi. Sirtou kan se landroi-la lé dan loséan Indien, éloigné plis dis mil kilomèt la kapital lo gran péi, épi dann in sityasion difisil konm sak nou nana koméla. Pars mi pans zot la konpri, pou pa shanjé, mi anparl La Rényon... nout ti patri. Nout gran patri, sé la Frans, mé sa, bann léktèr nout zournal i koné, é konm di lo kont, lé pa nésésèr répèt toultan la mèm shoz… mèm si désèrtin amontrèr i di la répétisyon lé dann kèr in bon pédagoji. Mi lès azot kas zot koko la dsi !

Donk, nout bann dépité l’avé in an pou komans fé avans bann projé pou La Rényon, pou son lékonomi, pou son sosyété, pou son lanvironman épi son kiltir. Dizon tout suit pou son dévlopman dirab... Mi vé pa di zot la pa fé arien. Mi pé mèm di, kan zot la travay dsi bann gran projé gouvèrnman, zot la travay dé foi pou La Rényon, dé foi kont son zintéré. A bien rodé, i pé trouv bann projé i sava dan lo bon sans konm sak i sava dann mové sans, mé zordi, mi parl pa la dsi. Nou na l’tan pou anparl de sa !

Solman mi oi pa bann projé i sava vréman dann sans zintéré bann Rényoné. Mi vé anparl bann projé i mèt nout péi an marsh pou son dévlopman an bazan dsi son sityasyon konm èl i lé zordi, son bann problèm konm zot i lé dopi in bonpé d’zané — pa arienk dopi sak i apèl la kriz ! — épi in bon vizyon pou l’avnir. Moin la pa vi nout bann dépité prézant désèrtènn loi pou konbat vréman lo shomaz, vréman la povrété, vréman pou fé gingn Rényoné travay sir plas, lo mal-lojman é tout nout boubou. Sof mon réspé, konm di lo patoi, moin na linprésyon zot i kont dsi baton tonton pou travèrs la rivyèr, é bin sa lé pa bon.

In dépité, sa lé an plas pou sink zané. Sink zané, sa lé kourt é sa lé long an mèm tan. I fo in pé i port atansyon talèr zot manda i fini avan k’zot la fine gingn fé kékshoz de bon pou nou.

Justin


Kanalreunion.com