Oté

Sinkantan apré lo boubou i suint ankor !

Justin / 26 avril 2016

Oté, pou vréman mi vé pa èt son plass minm si li an souplingn pa si tan télman, viv sak li la viv, lo shien i bwar-ar-pa d’lo. Sominn pasé inn marmay i pass dann télé, la zournaliss la prézant a li konm roprézanzan marmay la kréz, zot i koné kisa i lé lo bann marmay la krèz ? Banna té égzilé dofiss, forssé. Lo marmay la ékrir in liv pou rakont in pé komansa dann zané swasant li la rotrouv a li dan la krèz èk inn dé ti dalon.

Isi Larényon konm nou néna in kantité d’moun zilétré, dopi lontan minm, dizon banna la profit in pé d’sa pou anbèt domoun, pa aryink èk k’sa, mé sanm pou mwin zot la di anprofit in pé la d’si. Donkalor konm i di, la komanss par arash bann marmay orfélin, ou kiswa navé pi momon, ou navé pi papa, aprésa la anvoy bann marmay la famy konm kazimir, ziskatan té i pran sak té i pass sou la min.

S’tan la, banna i prétan di, rènyoné té fé tro zanfan é konm désertin départman déor té pou vidé la ansèrv banna pou ropèp laba. Ala koman zot la rotrouv a zot san konprann dann péi la fré. Mwin la pran lo tan pou akout lo marmay la ékrir, li tyinbo pa rakinn pérsonn, minm si li rosan a li dérasiné, laba li té son tousèl èk tou sak li la sibi konm son bann ti-dalon. Sanm pou mwin sinkantan apré lo boubou i suint ankor !


Kanalreunion.com