Oté

Sinon tansyon pangar !

Justin / 28 mé 2015

Kan nou té lékol, lé vré, pou in pé i romont dan lo tan, lo mèt té i di a nou touzour « fo zamé copié si out kamarad »donkalor nou té i ékout a li, ni té i kopié pa pou pa awar zéro « si i kopié i gingn zéro li di ». Alala nou prévni. Mé néna cirkonstans ou lé in pé tanté fé konm lé zot. Mi di pa fo fé ékzaktoman minm parèy mé dé zour lé tantan. Tou lé zour ou néna zékzanp konm sa mé si i pé ral an lèr, poukoué pa éséyè.

Argard in kou sak bann zéspagnol la fé an éspagn Dimansh dérnié. Sa i rapèl a mwin sak la éspasé an Grès na pwin tro lontan. Dann zéléksyon rézional èk minisipal, bann zéspagnol la nyabou rasanm a zot èk Podémos pou pran dé grann vil, Madrid èk Barsolonn. La fé konm in tranbloman d’tèr. Lo Parti an plass la gingn lo kou. Konm zot la fé lo rasanbloman èk tout, banna la nyabou arash la viktwar. Konm koué kan ou lé ini lé bokou pli fasil.

A nou osi nou néna zéléksyon rézyonal mwa d’désanmm dan sis mwa, lo 6 é lo 13. Konm i di « in fwa lé pa koutim », a nou osi anon kopié banna, pou in kou ni pran lo drwa. Poukoué nou osi nou trouv pa mwayin antann a nou rantronou , bann progrésis, pou fé in gran rasanbloman konm banna ? A nou osi konm podémos nou néna zindigné shé nou. Mi krwa i fo ni sava pli lwin ké dabitid dan lo rasanbloman. Argard pi ryink tèrla. Sanm pou mwin nou néna arkor lo tan, sé pa ni pé fé lo rasanbloman, sé ni dwa fé lo rasanbloman konm banna. Sinon tansyon pangar !


Kanalreunion.com