Oté

Sirandane, zé d’mo, dovine-dovinaye, kosa in shoz !

Justin / 30 zanvié 2015

Apèl sa konm zot I vé. Toutfason sé in zé. Pou sak i rapèl, sa té in zé té i zoué rant dalon, dann tan la vi té pa konm koméla. Pou moin, sa i fé parti la kiltir popilèr donk sa sé in n’afèr i fo gardien ; konm i fo gardien bann kont, bann shanté, bann provèrb épi d’ot shoz ankor. Pars na galman bann zé konm daye-daryon, kash-kash Nikola, zinzin la malis lé pa bon. Na osi bann éspor, kisoi la Krosh, kisoi ankor kou d’pyé bourant, é in pé bokou z’afèr konm ti-kaz, la marèl, zoué toupiy. Tousa sé la kiltir popilèr é si zot i vé alé ransegné zot va oir lé intérésan.

Mé zordi, ni vé anparl zé d’mo. Pa pou fé gran-gran diskour dosi mé pou prézant nout bann léktèr désèrtin sirandane, zé d’mo, dovine-dovinaye, kosa in shoz.. La shans é la bone frékantasyon i vé ké axel Gauvin la propoz amoin in bonpé zé d’mo…i paré, li na plis mil dann son mémoir l’ordinatèr. Ni romèrsyé ali, si ni pé trap inn-dé pou mète nout bann lélktèr o kouran.

Ousa, kansa ? Ni propoz, avèk nout dalon Justin épi Manuel Marshall, dann lo modékri « Oté ! » in zé d’mo lo mardi, lo zédi avèk lo samdi. Mi anprofite lokazyon pou dir azot ké lo lindi, lo mèrkrodi, épi lo vantredi zot i pé trouv dann lo modékri « Oté ! » in kozman pou la rout : in provèrb avèk in komantèr.
Donk ni donn azot randé-vou samd pou nout promé zé-d’mo. Ni pé donn in promyé l’éshatiyon, konm in rantré é zot va oir si sa i pé intérès azot.

In l’avangou : in l’amiz gèl !


Zé d’mo ; dovine-dovinay, kosa in shoz ?
“in momon noir na plin pti zanfan blan !”

… La pa dir pou trouvé si i mète in pé la tèt an plas, par plas.

Lo momon noir sé lo marmite ! Akoz ? Kalkil azot tousèl lo zanfan blan sé lo ri. Donk sé in marmite do ri. Bon apéti !