Oté

Sirman va trouv in bon program pou nou la-dan !

Justin / 3 mé 2012

Matant Zélida la ékrir Justin :
Mon shèr nové, mon spès salté,
Si mi tronp pa, zot, bann rouj-de-fon, zot i vé prann in kandida z’éléksyon prézidan an otaj. Kandida-la sé François Hollande. Pars moin la lir dsi zot bann papyé, bononm-la la réponn oui pou zot soi-dizan propozisyon pou La Rényon. Zot i di mèm li la sign in kontra avèk Parti kominis rényoné. Si mi tronp pa, ala in pyèj zot la fé tonm ali anndan... mé zot i kroi vréman, si lo boug i gingn lo z’éléksyon, li va réspèk son parol ? Kont dési, mé fyé pa tro. Konm in gran mazistra té i di : in promès, sa i angaj sak i kroi, pa sak i fé. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Rozman nana d’moun konm ou sansa nar té blijé invanté ! Pars si vi koné pa, moin va dir aou Parti sosyalis li-mèm la dmann bann mouvman dan l’Outré-mèr pou di sak zot i vé pou zot péi. Parti kominis la fé son propozisyon, é konm son propozisyon lé bien rézonab, mi oi pa pou kosa in kandida la gosh noré anvoy sa dingué : lo trin ? Sa in n’afèr nou la bézoin, si ni vé pa trap in koma sirkilatoir. L’otonomi dan l’énèrzi ? Kisa lé kont si i tir bann pétrolyé profitèr. L’otonomi dan nout sifizans alimantèr ? Sa, tout Kréol lé pou sa. L’ozman sosyal ? Ou i dira pa nou la pa bézoin. Done Kréol travay ? Pèrsone lé kont... Arzout èk sa son soisant propozisyon pou la Frans é son trant propozisyon pou bann péi l’Outré-mèr. Sirman va trouv in bon program pou nou la-dan. Tok ! Pran sa pou ou !

Justin


Kanalreunion.com