Oté

Sis-san mil touris, dé mil bus, gran shantyé, Dizon l’arlézyène, sansa lo monstr lo Lockness !

Justin / 1 désanm 2011

Yèr midi avèk in bout, moin té apré rogard in télé mi koné pa lakèl vi k’nana in bonpé koméla, é vi k’moin lété pa mon kaz. Toudinkou, la parl dévlop tourism La Rényon. In sosyété l’éspésyalis dan tout éspésyalité l’apré travay la dsi a s’ki paré... mésyé Didier la komann in l’étid. Biensir, li té la, é son figuir té i okip près tout lo l’ékran. Lé vré, lo l’ékran té pa bien gran, épi dan désèrtin télé, i ézit pa bien amontr lo boug késtyonn fé marsh in pé son kominikasyon.

Donk lo prézidan la mèt a parl dsi tourism, solon li lo sèl parad pou dévlop lo péi. Aprésa, li la arzout son projé goumant lo nonm touris ziska sis-san mil l’ané 2015. Dizon lé plito mal parti vi ké sèt-ané, i sa pa goumant bonpé, sar a pépré kif-kif l’ané dèrnyèr. Mé sis-san mil touris, mi pans pa va trouv sa dsou la pat shoval. Sirtou kan i komans baz dési l’Australie, épizapré ramas bann myèt l’il Maurice, épi ankor in bann truk pèrsone i koné pa si sa i marsh vréman, ou bien si sa i fonksyone pa…

Toudinkou, moin la antann in drol z’afèr. Mi koné pa si moin la mal antann sinonsa si lo boug la di sa pou vréman. Kèl boug ? Bin, lo l’éspésyalis dan tout l’éspésyalité, an misyon. Li la di, in pé d’moun dann l’Erop i sava an touris dan la Colombie, sansa dann Pérou, pou alé manz manzé d’moun i fé kui la-ba. Lo boug i arzout, konm manzé La Rényon i fé kui in pé konm la-ba, èk lo mèm fournitir, épi lo mèm kondiman, akoz demoun i sort ar pa dann l’Erop pou manz manzé La Rényon. L’èr-la, moin la mèt a kalkilé : nout zanbrokal, nout masalé, nout katrépis i sava ral touris isi, é an pliské sa, ral dé-san mil touris an plis ? Sa lé a voir sa ! Mé lo match lé pankor gagné.

Lo dé mil bus, lo sis-san mil touris, la rout sis voi, lo bann gran shantyé madam Sudre i vèy do pré... Dizon, l’arlézyène, sansa lo monstr lo Lockness ; i di li léla, mé pèrsone i oi pa !

 Justin 


Kanalreunion.com