Oté

Sobatkoz dann télé : méyèr program, sé la n’ote, la poin pou douté !

Justin / 31 mé 2012

Mardi soir, dann télé, moin la vi in sobatkoz rant Lebreton épi Elie Hoarau. In sobatkoz èk dé pèrsone pars kandidate l’UMP, in sèrtin madam Sigismeau, la pa vni. Pou kèl rézon ? Mi koné pa. Pétète la pèr lé dé z’ot i asiz dsi èl, pou domann aèl ésplik in pé tout bann z’ané la kriz nou la konète, par la fote gouvèrnman é galman par la fote mésyé Didier. Lé vré, kan ou i jakas tousèl, ou i pé anparl bilan, rézilta, étsétéra, la ké lo ra. Mé kan nana demoun pou port aou kontradiksyon, sé pi la mèm shoz ditou.

Donk, konm té i rès dé pou débate, shakinn la ésplik son program. Mé avansa, zot la ésplik in pé la sityasion dann Sid ké la pa bon ditou, pétète ankor pli mové ké dann Nor épi dan l’Ouès. Dann déba, moin la aprann inn dé z’afèr : konm par égzanp l’aéropor Pyèrfon i marsh pa bien, poitan sa in bon zoutiy pou dévlop lo Sid. Mé sépa kisa k’i rapèl, la poin lontan, kan la Réjyon la domann dévlop Pyèrfon, mésyé Fillon, an pèrsone, la di la pa bézoin pars nana la rout tamarin pou vni Sin-Dni. Biensir, la Réjyon mésyé Didier la pa fé dézord, pars banna lé konmsa, zot i vé pa déplèr gouvèrnman la droite. L’èr-la, olèrk avansé, lo Sid la rokilé... Arzout èk sa, in l’inivèrsité k’i dévlop pa. Armète la dsi in l’opital dan l’éta k’tout demoun i koné... Si zot i oi lo por Sin-Pyèr, mon dyé ségnèr, moin lé sir zot va tir zot moushoir pars lé pa vayan ditou, lé mèm kaziman dan l’abandon.

Fransh vérité, kan gouvèrnman lé pa bon, kan in kasèr i rant prézidan la Réjyon, kan in mèr la poin z’anbisyon pou son vil-mèm, in gran vil konm Sin-Pyèr, lé shoz i patine ; Olèrk avansé, i arkil, é sé nout péi é son popilasyon k’i soufèr... Poitan nana solisyon, nana z’afèr pou fèr, é nout kamarad Elie la arparl ankor sak nou la bézoin absoliman konm l’otonomi dan l’énèrji, l’otosifizans alimantèr, lo trin, épi bann mézir sosyal. Li la rapèl lo kontra nout parti la sign èk lo Prézidan, koman sa lé bon pou nou. Lo méyèr program, sé la n’ote… ankor in foi, nou la vi sa ! Sé la n’ote, la poin pou douté !

 Justin 


Kanalreunion.com