Oté

Sof koué k’ti di, mé k’ti koz byin !

Justin / 26 mé 2010

Matante Zélida la ékrir Justin :
Mon shèr nové, mon spès salté,
Na in n’afèr i fo mi di aou, pars moin lé sir sa va fé pass aou in mové zourné. Vi koné la ministrèz l’outre-mèr i sorte pass inn-dé zour La Rényon. Vou la sirman antann èl i shass pa avèk bann rouj-de-fon déssi la késtyonn tram-train, vi k’èl la di, si i konte déssi gouvèrnman pou goumante le pèyman pou sa, démyé agarde dan in trou. A par k’sa, vou la vi koman madam-la lé zoli, avèk son pti bèk roz, son gayar linz, épi son zoli déguène. E son kozé mon névé. A ! Konm sa i koz byin. Tok ! Pran sa pou toi.

Justin la fé pou répons :
Mon vyé matante k’i koz touzour la boush rouvèr,
Piské ou i anparl amoin la ministrèz l’outre-mèr, moin la byin romarké, solon moin, èl la pa anparl noute problèm an vré. Lé normal, pars sanm pou moin èl i koné pa zot byin. Mé an plis, i diré èl la poin l’anbisyon pou nou, pou toute bann péi konm nou lé l’ote koté la mèr. Lé domaz, kan i nonm in miniss l’outre-mèr i pran pa konte de sa ! Poitan, l’outre-mèr nana z’afèr pou aporte pou La Frans, konm La Frans nana z’afèr pou aporte pou nou, dann l’intéré lé inn épi lé zot. Mé piské ou i anparl son kozé, ma rodi aou solman sak in madam té i di, apré an avoir antann in gran diskour Gasparin, ou i pé prann sa in pé pou out grade... Donkalor, lo madam té i di :« Sof koué k’ti di, mé k’ti koz byin ! »

Justin


Kanalreunion.com