Oté

Sokour ! Sarkozy i rovien !

Justin / 16 février 2012

Yèr soir dann télé, li la di, li lé kandida. Pou kosa li la fé sa ? Mi domann amoin bien, pars dépi in bon koup de tan, toulmoun i koné li sar kandida. Dabor pars li pé pa pran in n’ot désizyon ! Mazine in kou, li té di yèr soir, li prézant pi. Dan kèl traka li nora mèt son famiy politik. Arzout èk sa, konm son shoviy lé gonflé, li pans, lo méyèr sé li. Armèt èk sa, lo bann patron la Frans la bézoin ali. Zot i koné osi, l’Almagn la bézoin ali pou èd aèl plime lo volay l’Erop. Kosa, li personnel, li rod la-dan ? Ptèt la fortine, sirman gonf son fyèrté.

Zot i ansouvien son bann promès ? Lété vayan, é in bonpé té i pans, lo tan dori mangalor té fini, lo tan bon ri blan té i ariv... lo tan manz patat èk la po lété déyèr, lo tan bon manzé lété dovan. Travay plis va gingn plis ! Alon sov lo sistèm rotrèt ! Alon sov la séku. Alon protèz bann fèb ! Alon dévlop l’Outre-mèr ! Donn travay Kréol sir plas ! L’èr-la, son manda lé près fini, é kosa nou, bann ti-kolon, nou la gingné ? Nou la anpèrd bon pé z’afèr plito. Ni vé, ni vé pa, li la raz anou san savon.

Mé pétèt zot i di, li la fine fé si tan tèlman mal a nou, na pi arien pou tiré dsi nou ! Pétèt galman zot i di, li la fine fé anou si tèlmann tor, li la fine si tèlman taz anou ké na pi arien pou fé kont nou. Kroi pa sa ! Mi pans, li na touzour dé shoz pou fé pèrd anou. Mèm bann réform la fé na diz-an, sansa kinz, sansa vin, li vé arvni dsi ; La prèv, li l’apré démont la sékirité sosyal, bout par bout, é sa i dat pa de yèr. Li rèv siprime lo SMIC konm la fé dan l’Almagn épi d’ot péi. I fo ni méfyé ; ni koné pa kisa va ranplas ali, si li pèrd… kosa sak i vien, si sé in n’ot ké li, va fé pou vréman, mé li, nou lé sir, li sa fé mal anou ankor plis. Sokour ! Sarko i rovien !

Justin


Kanalreunion.com