Oté

« Son pil lé plate » – In kozman pou la rout

Justin / 24 zwin 2015

Mi majine, zot lé konm moin. Sa la pa la promyèr foi zot i antann in kozman konmsa. Konm dann tout kozman nana son sans prop épi son sans figiré. Sans prop ? La lanp i klèr pi pars la pil lé plate !

Sans figiré ? Moin na pi l’énèrji, moin lé faye, mon kor lé mol. Dé foi na in tournir la malis. Son pil lé plat : li lé in pé inpuisan dsi lé bor. Moin la mèm antann dann in ron batay kok : « Pti kok shatigan-la, son pil lé plat sa ! ». Lo kontrèr ? Lo pil i donn paké.

Zot i oi la pa lo mèm zafèr. Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir si rant-rant, ni tonm pa tazantan dakor rantre nou.


Kanalreunion.com