Oté

Sorte dann fénoir pou rant dan la limyèr !

Justin / 2 novanm 2009

Souvan défoi, mi ékoute l’émissyon, dann radyo, i port déssi la zénéalozi. Fransh vérité, sa lé intéréssan, pou toute ransègnman bann pèrsone i fé sa i donn épi galman pou toute késtyon bann z’oditèr. Banna i vé konète kansa zot z’ansète l’arivé, si zot lé la dépi lontan sansa dépi solman inn-dé zénérasyon... I fo konète ousa ou i sort pou konète ousa ou i sava, konm di lo konte.
Na dé foi, le z’oditèr i di in nom épi le z’animatèr i di konmsa, sa in nom lé konü dépi 1848, la date l’abolisyon. Ou i san konm in rogré dan la voi le z’oditèr… pétète pars lo moun i vé konète kossa la éspas avan, dann tan té i pran pa la pène done in nom bann zésklav, dann tan demoun l’avé momon, mé té i pran pa konte èk lo papa...
In bon pé d’moun, moin lé sir, lé dékourazé, pa par le l’émissyon, byin sir... mé pars zot nana dan l’idé i trouv ar pa zamé la vérité, la vérité, dann fon zot mèm, zot l’apré rodé. Mé mi pans i fo gard l’éspoir, i fo touzour gard l’éspoir, pars na d’moun i shèrch… pars na dmoun i trouv épi shak foi k’i trouv in n’afèr, shak foi k’i tir in pti boute lo passé nout pèp dann fénoir, sé in boute noute passé pèrsonèl k’i rant dan la limyèr.

Justin


Kanalreunion.com