Oté

Sote koman ti vé koko, toué lé pri dan la min korbo !

Justin / 25 octob 2011

Kosa k’i ansèrv in prézidan la Répiblik bouzé konm sa ? Kosa k’i ansèrv ali alé Berlin in dimansh, alé rényon partou dan l’Erop, mèm l’androi lé pa prévi ? Kosa k’i ansèrv fé sak li fé, san rézilta, la plipar d’tan dé foi san an avoir arien pou déklaré. Dimansh dèrnyé, li lété Berlin, pou li anons mèrkrodi 26 i sava trouv in bon solisyon. I paré, solon sak in pé i di, li fé tousala pou rasir bann marshé. Lé bien domaz, bann marshé lé pa pli rasiré avan son vizit ké apré. Sof mon réspé, li nora myé fé okip in pé son pti baba la-ba dann Paris.

Zot i koné, bann moun i arète pa boujé konm nout ti-prézidan, sa i done lé z’ot in tournman dan la tète. Moin lé sir, si li té arète in pé trankil, bann marshé nora roprann in pé plis konfyans... Si lé posib. Pars kan ou i apran mové nouvèl par dsi mové nouvèl, lé pa fasil ète rasiré. Kou dsi kou, i anons bann bank sar blizé abandone la moityé l’arzan zot la anprète la Grèce, pétète in pti zyèk anplis si lé nésésèr. I di ankor, l’Itali lé si tèlman dann malizé ké inn apré l’ot, madam Mèrkèl é nout ti prézidan la tap dsi l’doi Berluskoni. Mi pans lo boug la trouv lo pilil amèr, konm kashé kinakrine, pars la pa li solman lé dann malizé. L’Espagne galman la pankor trouv son shomin galizé. Mèm to pou la Frans. Boudikont, na arienk bann péi l’Erop di nor l’ékonomi i marsh a popré konm k’i fo.

Kosa nout ti prézidan i éspèr an avoir ? La popilarité ? Kont touzour, mé fyé pa dsi. Li pans bann Fransé i sava argingn konfyans dan li ? Mèm si zénéral De Gaulle té i di bann Fransé na poin la mémoir, so kou isi, i diré zot i souvien bien lo kou Sarkozy la done azot dépi 2007. La pa arienk la Frans... i paré ké son popilarité lé apré dégringolé isi La Rényon. I di konmsa, katrovin-troi pour san bann Rényoné i vé li sava. Alor, son boujé, dan tout diréksyon, sanm pou moin, sa i ansèrv de rien. Konm bann vyé shanson Mardi Gra té i di : « Sote koman ti vé koko, toué lé pri dan la min korbo ! ».

Justin


Kanalreunion.com