Oté

Souèton kant mèm, si i fé rout-la in zour, èl i fini pa par éfondré konm défin pon di Nor !

Justin / 30 avril 2011

Kan in n’afèr la mal komansé, lé rar li fini bien ; Pli pir, shak foi ou i kroi ou la trouv in bon kalité solisyon, ou i azout in difikilté anplis, pou pa dir in l’inpass an plis. Sa lé vré pou foutbal, pars kan out dalon la fé in loupé, ou i fé in n’ot déyèr li, é si nana in troizyèm dalon, li ossi li loup. Di pa moin sa la pa vré ! Rapèl azot solman in pé zot jènn tan. Bon ! Bin, la pa tousa !
Zordi mi vé parl in pé déssi la rout litoral. Mi souvien, kan la lans projé-la, l’avé in konséyé té i apèl Henri Lapierre. Moun-la la mète an gard lo préfé, épi lo prézidan Konsèy jénéral, si mi tronp pa, dann tan-la, l’été Roger Payet. Méssyé Lapierre la di i fo fé antansion pars la rosh lé pa solid é la tèr i tienbo pa bien. Arzoute èk sa, li la prévnir banna pou dir, in route dann koinn kap konmsa, sa lé pa in bon z’afèr. Ni koné la suit : éstèr nou lé fine ariv in dézièm épi in troizièm rout, avèk in sékèl problèm. Le boug té i trouv lété pli préférab fé in route déssi la montagn ; mé bien antandi, la pa ékout ali. In kominis, bien souvan, banna i done tor san pran la pène rogardé si li oré poin rézon ;
Kan Paul Vergès lété prézidan é konm l’État té i sort done la Réjyon lo patate sho, kaziman lo kado anpoizoné, la déside fé in nouvo route kat voi ; San atann lo bann rézilta, méssyé Didier, san pasyans la déside i fo fé in rout sis voi, va kout sépa konbien larzan. Mé, sanm pou moin, sa in nouvo rafistolaz, é avèk nout klima, nout mèr koman i lé, l’éshofman klimatik, nivo la mèr riskab monté, lé possib sar ankor in nouvo loupé. Éspéron kant mèm, si i nyabou fé rout-la, èl i finira pa konm défin pon di Nor... shavir dann fon la mèr.*

* Sa in dans ronn bann fiy té i shant dann la kour lékol.

Justin


Kanalreunion.com