Oté

Sré bien si tout té i done la min ansanm. Mé konm i gingn pa, nou va dir, in bon l’inyon la pa mal non pli !

Justin / 7 séptanm 2015

Zot i koné dann kèl difikilté ni lé isi La Rényon. Zot i koné osi ni sava viv in bann z’ané lé riskab ète bien difisil pou nou rényoné. Pa solman pou nou, mé pou in bone parti l’imanité é konm nou lé solidèr ni pans anou, ni pans galman tout sak lé dann difikilté in pé partou. Sak la vi lé roz pou z’ot la pa bézoin i okip dé zot, mé sak lé dann malizé i pans pa lo mèm z’afèr bien antandi.

Dann nout sityasion nora été bon tout demoun i done la min pou trouv in bon solisyon pou nout tout mé amoins ké nou rèv, in n’afèr konmsa lé pa posib. Pou kosa ? Pars dann tout sityasion nana sak lé viktime, donk li rès atèr, épi sak i anprofite bien. Donk akosa k’i ansèrv domann sak i anprofite bien d’ète solidèr avèk bann viktime kan zot i nouri azot dsi la mizèr lé z’ot é zot i bénéfisyé d’in drol kalité partaz, tout pou moin, arien pou ou. Konm di kréol : sak lé aou lé amoin, é sak lé amoin lé pa ou !

Donkalor, fé l’inion tout demoun ansanm i fo pa révé, i fo fé l’inyon sak lé posib. Dann lo ka k’i konsèrn anou pou zéléksyon zot i koné nout parti kominis i rode dopi lontan lo shomin pou fé l’inion é in bon l’inyon, pa in l’inyon pou la fasade, mé in l’inyon dsi in program k’i sava dann sans l’intéré bann rényoné dann la difikilté. Zot i koné sa lé an shomin é bin i fo souète ké sa i ariv, é ké la majorité d’moun i konpran, i tonm dakor, épi i aksèp donn la min ansanm. Sé sa ké mi apèl in bon l’inyon !



Inn modékri, inn ti lavi, inn komantèr ?



Bann modékri andann forom






  • Lo problèm, akoz dé zégoisme des in , des otes, tou sak la bozoin ete défandi i rotrouv azot vandi dann tantkouver. moin midi dépass bann ranker personel , reg ali deryer la kuisine si bozoin, mé foutor défand tou sak i apel o sokour dovan lo rouleau kompresseur de larzan, i fo lo kouraz telman nou koné pi ki lé ki ,akoz de zaranzman de tout sort pou protez souvan zintéré personel é sa i agas in kombatan ké la inskri ali dann la litte kolektiv,li i sakrifi bokoup de shoz sé pa pou met enkor komander.

    Article
    Inn modékri, inn ti lavi, inn komantèr ?


Kanalreunion.com