Oté

Sré bien !
Sré mèm in progré pou la démokrasi !

Justin / 12 mars 2012

Dann télé, in résponsab parti l’apré kozé. Sa résponsab parti vèr- Erop ékoloji. Dan son kozman, nana in pé tout : nana z’afèr i pé èt dakor èk li, nana z’afèr i pé èt pa dakor èk li san-pour-san. Li di galman désèrtinn balivèrn i kas pa lé kat pat in kanar. Toudinkou, zournalis i domann ali : « Intèl-la ? Sa lé dan out parti sa ? Ou i pé di si li lé a-zour son kotizasion ? Si li la rovèrs azot son z’indamnité d’z’éli ? »... Donk lo boug i rant dann in rézonman antortiyé, pou fini par rokonèt la pèrsone i rovèrs pa son z’indamnité son parti.
Ala in n’afèr lé piblik é i koup amoin... kant in z’éli i toush z’indamnité épi li rovèrs pa son parti sak li doi rovèrsé. Pars si ou lé dann in parti é si lo parti i èd aou gingn in manda, ou i doi pa ankès lo z’indamnité arienk pou gonf out pla. Ou i di, ou i travay dan l’intéré zénéral, sa lé bien bon, mé dan l’intéré zénéral out posh, sa la pa bon ditou. Biensir, si ou i okip out tan san pour san pou défann out z’idé é sak out parti, lé pa oblizé ou i krèv la fin, mé lé pa nésésèr ou gonf out pla plis k’i n’anfo. Arzout èk sa, si ou i fé in boulo indéksé dsi la vi shèr...
Pou kosa mi di sa ? Pars kan ou i antan d’moun apré di, in pé i fé la politik par intéré, bin sa sé in n’afèr mi pé pa ankésé, sirtou dann in péi domoun lé o-flan konm La Rényon. Sirtou dann in péi ousa nana, sanm pou moin, in gran kivèt rant lo pèp épi la démokrasi.
In l’idé i vien amoin toudinkou, bitanblan, konmsa. Mazine in kou, dan shak parti noré in group de moun, shak ané, i fé in kontrol pou oir anparmi bann z’éli sak i arvèrs é sak i arvèrs pa, sak i arvèrs konm k’i fo é sak i arvèrs pa konm k’i fo, épi i domann in sort rodrèsman. Sré bien ! Mi pans mèm sré in progré pou la démokrasi.

Justin


Kanalreunion.com