Oté

Sré-t’i k’i mète zèf poul a kouvé pou éklo ti-kanar ?

Justin / 9 févrié 2010

Kossa mi sort antann dann télé ? Kossa d’apré zot ? Mi sort antann méssyé Vergoz, sosyalis san-pour-san, apré di li lé pa kont lo tram-train, mé konm gouvèrnman i rofiz donn katrovin milyon, i fo rode in prozé altèrnatif dé transpor an komin… lo kar, é si i fo, déssi la route. Dizon ala in moun i bate dann do Virapoullé, in frèr d’sang lo martin Sintandré ; Par l’fète, moi d’désanmm, prézidan la Réjyon la konvok in l’asanblé plégnèr pou domann toulmoun pou dir z’ot volonté oir so tram-train avansé. La mazorité la vote in rézolisyon, é kossa méssyé Vergoz la fé ? Li la défil an zourite… apré an avoir gonf son jabo pou amontr, soidizan, li dékil pa dovan gouvèrnman.
Alors, li noré pa antann lo lètr Promyé minist la ékri pou dir i fo fé aprouv sa par in loi, pou gingn in l’ède an plis ? Alors li noré pa konpri sa sé in droi pou nou… in droi été trété konm toute bann Réjyon an frans ? Li koné pa fraz-la : « nou lé pa plis, nou lé pa moins, réspèkt anou » ? Lé vré ké Laurent, sa lété in onm, pa in kouto détayan, in kouto koup dé koté.
Kisa li vé boush lo zyé-la ? Kan nora dé foi plis loto, kamiyon, moto, i sar mète ankor lo kar an poundyak déssi la route… pou amènn anou drouète dann koma sirkilatoir ? Li konpran pa li l’apré di in bétiz pli gro ké son tète ? Konm di lo konte : li lé boushé, sansa li kroi nout zyé lé boushé, sansa lé dé, li lé kouyon sansa li pran anou pou dé kouyon, sansa lé dé an mèm tan ? Kèl kalité manzé koshon l’apré fé don ? Sré-t’i ké la roz nora pétal blé moi d’mars ? Sré-t’i k’in pé l’apré mète zèf poul a kouvé pou éklo ti kanar ?

 Justin 


Kanalreunion.com