Oté

Suisid, Kan na pi, sansa kan ou i oi pi in sèl pti bout blé dan out sièl pèrsonèl !

Justin / 25 zanvié 2013

Yèr matin, dan mon vié kok loto, mi rouv mon radio. Dsi in shèn, i di, demoun i boush lo pon l’Antre-de. Mi apui dsi in n’ot bouton, mi antan i di, demoun i boush lo mèm pon. Dsi in n’ot radio, i parl sa mèm-mèm… mi di, m’a ékout in pti bout pou konèt kosa l’arivé. In marmay dézéspéré la jèt son kor, é konm i fo l’élikoptèr pou alé rod ali é konm l’élikoptèr i tard in pé, demoun la désid boush lo pon tèl fason ké bann résponsab i fé in pé pli vit.

Suisid ? Sa in n’afèr lé kouran La Rénion. Pa arienk zordi, mé zordi nana in pé plis demoun i vé fini èk zot vi... Moin la antann dann in radio, épi moin la lir osi dann zournal, tou lé troi zour, in moun i fé in tantativ suisid isi La Rénion. Pou kosa ? Sirman pars demoun lé dézéspéré. Zot lé dézéspéré, é zot i oi pa in n’ot manièr ansort azot dann tablatir la vi ké fini èk sa. Pou kèl rézon zot i oi pa in manièr pou sort dan l’inpas zot vi ? Na in dalon la di amoin konm sa, kosa i rès aou pou fèr kan out sièl, tou lé zour, na poin i pti bout blé. Sansa ou i ariv pa oir in sèl pti bout blé ? Si ou i ariv pi trouv in sèl rézon pou pous out vi pli loin, ou i koup out fil la vi.

In pé i di osi, in tantativ suisid, sé konm inn apèl o sokour. Inn apèl o sokour, sé konm si ou i vé dmoun i pran konsidérasion pou out sitiasion, donk èd aou ansort aou. Sa sé kan ou na in pti l’éspoir ansort aou. Mé plizanplis, la pa in l’apèl o sokour, mé in désizion kalkilé, dann in sosiété, oplis i sava, oplis demoun na poin la tan pou okip out ka, vi k’demoun lé pli okipé par zot ka pèrsonèl. Oplis i sava, oplis nout sosiété lé pa solidèr, é kan ou i pans nora inn pou sokour aou, tro tar na poin pèrsone. Mi vé pa dir, si in moun i désid suisidé, li trouv ar pa dmoun dsi son shomin pou anpèsh ali fèr. An kontrèr, li lé riskab trouv in bonpé d’moun pou sèy anpèsh ali. Mé avan, kan ou la komans désann la pant, kan té ankor tan, lé posib ou la pa trouv kansréti in moun pou tyinbo aou, pou ral aou in pé an arièr.

Justin


Kanalreunion.com