Oté

Tank nou na fanal pou éklèr a nou

Justin / 29 octob 2014

Nou lé dan in kid’zak. Nout péi lé a bou d’souf. Zot la antandi sa souvan. A nou, néna déza lontan ni di sa. Dopi lo tan Paul Vérgès i provyin, si i kontinié konmsa ni sar koul o fon, na bat dann mir, tangaz va pété, i tyinbo pa kont. Ala zordi li lé pi sontousèl pou di, rozman, tout i rokoné i gingn pi avans dovan, ni rokil dèrièr. Kosa i fo fé ? Tourn lo pouss ? Fé konm lotrish, bour la tèt dann sab pou pa war ? Fé shakinn son shakinn ? Dann zournal lindi Paul Vérgès i rovyin si léta nout péi zordi, li donn son vizyon éklèr si tout. Dabor inn, kosa i vé di k’lo péi lé a bou d’souf ? Ké nou lé dann in kid’sak ? Bin nou lé konm zwazo dann in gob, konm ti souri dann tapèt, lo péi lé dann in linpass parlfèt.

Sétaki na son dir pou sorti, in pé i propoz géri kansèr èk in bransh kamomyi ousinonsa inn ti pié tronp-la-mor, ousanisava ? Pou dot, roul konmsa na pwin ryin pou war, ni kontinié konm sa, pou dot ankor va donn in kalminn é tousa va rant dan lord domin. Alala romèd banna, ankor, kan i vol pa sad nou. Tankadir, na pwin ryin ditou. Sa moun séryé sa ? Paul Vérgès i di ankor, lo moman lé grav, atann pa domin, arèt èsèy kass la fièv èk in laspro, i fo mèt ansanm, rasanm a nou pou dévlop nout péi, arèt may-mayé, pèrd pa lo tan, mèm si nou pa dan mèm kan, si ni dor pa mèm kaz, ni pé réini a nou in fwa, shakinn amènn son bout, son lidé, inn plis inn i fé dé, ni razout tout pou trouv la klé. Mèt létikèt dan nout posh, shapo d’si. Lé koni ké shakinn son koté ni poura pa ral lo péi dovan. Lé pa tro tar pou sa. Sak néna prozé mèt si la tab, ni lir, sak néna propozisyon anvoy, na war.

Lé sir anou, nou lé lwin dovan, nou lé paré pou déboushé nou, pou kozé, kont si nou, kiswa si travay, kiswa si lozman, si lékol, si laménazman nout téritwar, si lagrikiltir, si lanvironman, si lénérzi, si nout plass dan la zonn… si dot ankor ni fé travay nout koko. Si nout léstati osi, i fo ni an koz. Mi pé ankor grandi la lis, bann an fass mèm i rokoné, i di partou a nou méyèr andanla. Ki pé prétann an awar otan prozé pou démay nout péi ? Pétèt in pé i rofiz kozé, parské na pwin ryin pou di ousinousa i vyinpabou sogonn èk nou si lo sizé. Néna osi konm sa. Lé la, i dobout, i fé la mass. Kantanou ni kontinié travay, mèm la nwit ni sobat, ni anprofit tank nou na fanal pou éklèr a nou.


Kanalreunion.com