Oté

Tansion pangar, sa v’ariv pli vit ké ni kroi !

Justin / 6 mars 2013

Matante Zélida la ékrir Justin :
Mon shèr nové, mon spès salté,
Lé bien difisil suiv azot, bann rouj-de-fon, kan zot i anparl légalité sosyal. Moin mi konpran zot i vé sirman siprime lindèks koréksyon épi la prime la vi shèr bann fonksyonèr i gingn kan zot i travay isi La Rényon. Solman, si lé vré bann fonksyonèr i apèrsoi zot sir-réminérasyon, zot i dépans isi, é sé par zot ké larzan piblik i aroz in pé lékonomi nout péi. Alor, si i siprime bann prime-la, bann komèrs nora plis difikilté é sar blizé lisansyé. Donk, lo moun i travay dann komèrs, si zot i pèrd zot travay, zot lé riskab tonb dsou l’pa d’port la povrété. Poitan, zot, bann rouj-de-fon, zot i di partou i fo siprime la mizèr. Mi oi pa tro koman i siprime la mizèr an goumantan la povrété. Tok ! Pran sa pou toi !

Justin la fé pou répons :
Mon vyé matant k’i koz tozour la boush rouvèr,
Si mi konpran bien, ou i roprosh anou pa siport linzistis é ou i tourn sa konm kari sou d’ri an dizan nou lé kont bann fonksyonèr. Na poinn rézon èt kont bann fonksyonèr sirtou kan zot i fé bien zot travay... Solman, pou kosa gouvèrnman i aksèp in sosyété ékartiyé konm sa dsi la késtyonn rosours… mèm si dan zot boush nana touzour lo léksprésyon "la zistis sosyal", zot i fé pa arien pou sa. La loi départman fransé l’ané 1946 té i vé pa in n’afèr konm sa, té i vé la zistis épi légalité. La zistis avèk légalité, nou lé bien loin zordi ! Arzout èk sa, bann sosyété komèrsyal, konm zot i oi, in minorité d’moun i gingn pèy bann marshandiz shèr, i astik toulmoun parèy : pov li ! rish li ! travayèr li ! shomèr li ! gro vaza li ! pti kolon li ! I astik tout, vèrt é sèk.
An plis ké sa, vi koné matant, gouvèrnman i rod fé lékonomi, é li louk par koté bann péi l’Outre-mèr. Li l’apré kalkil koman siprime bann zavantaz pou l’Outre-mèr. Pa pou rann sa lo péi épi èd ali règ in pé son problèm, mé pou gard sa dan son posh. Tansion pangar, sa v’ariv pli vit ké ni kroi. Tok ! Pran sa pou ou !

Justin

* Bann famiy i toush plis dé mil sink san éro par pèrsone é par ané


Kanalreunion.com