Oté

Tansyon pangar ! Lo koukou-la, sa la pa in zoizo La Rényon !

Justin / 23 zanvié 2010

La-ba dan la Frans, é sa lé byin vré, vi k’moin l’avé lo liv kan moin lété marmay... nana in zoizo k’i apèl lo koukou. Sa in kid’ta bouète zoizo sa. Li fé pa son ni, li... Li ponn son zèf dann ni lé z’ot. Li bate zèf lé z’ot atèr, épi lé z’ot i kouv zèf lo koukou ziska lo pti i éné. Pou kossa sa mi an parl ?
Zot toute i koné la Réjyon la fine fé in bonpé z’afèr pou dévlop bann z’énèrzi prop épi pou lo dévlopman dirab. Shakinn lé sansé d’avoir sa dann son tète… zot i koné ossi koman in bann komine la profite so lélan-la pou zot ossi rant dann ron l’otonomi énèrzétik. Sa lé byin bon pou nou ! Oplis va fé pou dévlopman dirab, oplis sora bon pou nou, pou nout l’anvironman, pou lo bon égzanp ni pé doné, pou nout lékonomi ossi.
Ala l’État, li ossi, avèk in pé d’rotar, la rant dann ron, la fé son plan Gerri, épi La Rényon il-vèrte. Bon pou sa mèm ! Kan lo prézidan té issi, li la fé sign in lète bann kapitalis pou sèy mète in rézo pou fé in shène pou sharj bann batri loto éléktrik. Zot i suiv amoin la ? Mi éspèr. Pars si toute i done la min pou ral sharyo dann mèm sans, lé bon ! Si toute kalité l’antropriz i trouv son kontan dan l’afèr, lé bon galman ! Si bann z’artizan nana in l’okazyon pou gonf son pla, OK ! Si bann travayèr i gingn in plas travay, lé byin bon !
Mé si sé pou bann kapitalis ésploite anou in pé plis, la, la pi bon ditou !
Obli pa, nou lé pa zèrb tronp-la-mor k’i ropli son fèy kan i pass koté li… nou lé pa kane koush-a-tèr i kapote kan kou d’van i ariv. Sirtou k’i obli pa, tansyon-pangar… ké lo koukou-la, sa in zoizo déor, sa la pa in zoizo La Rényon !

 Justin 


Kanalreunion.com