Oté

“Témoignaz” lé mor, viv “Témoignaz” ! Li bouz ankor !

Justin / 16 désanm 2013

Dan la famiy, moin la toujour vu zournal “Témoignages”. Tou lé zour nou té i lir sa. Mèm kan moin la fé mon zétid dan la Frans, moin la domandé k’i anvoy amoin lo zournal. Aprésa, kan moin la rotourn La Rényon, moin la abone amoin in sèl zournal, sé “Témoignages”. Sa la akonpagn amoin dan lo bon konm lo mové pèryod la vi. Pou kosa ? Pars, san vanté, mi pans zournal là té i aport amoin, konm lé z’ot léktèr, in fason oir, konprann, analiz lo mond tèl ké li lé. Mi di sa san ont pars mi pans nout zournal i ésplik anou lé shoz konm zot i lé, i dékod sak la bézoin dékodé, é i propoz son bann léktèr in métod — dizon in griy — pou fé rant lo bann zévènman anndan épi pou ésplik azot. An plis ké sa, “Témoignages” i sava touzour dann sans kontrèr bann zidé dominant, é sa sé in n’afèr mi aprésyé bien.

Konm bonpé d’moun, moin té i koné nout zournal té apré travèrs in kouran difisil, é konm in bonpé, moin la sèy done in kou d’min, pa vréman pou tir ali dann malizé, mé pou pèrmèt ali kontinyé la lit li l’apré améné dopi touzour. Dé foi moin té in pé trakasé é moin té i kalkil kansa lo mové nouvèl té i doi arivé. Mé konm té i tard, moin la komans an avoir léspoir nout zournal té sové. Ziska samdi soir, kan moin la antann di dann télé : a partir d’lindi, “Témoignages” i sort ar pi. Dsi l’kou, moin la konprann té i sort ar pi ditou, é zot i pé konprann moin la près tonm a tèr...

Ziska ké lo diréktèr i anons “Témoignages” papyé i arèt sorti, mé “Témoignages” dsi lo nèt i kontinyé. In mové nouvèl biensir pou demoun konm moin pli abityé lir zournal dsi papyé ké zournal dsi lordinatèr, mé in moin mové nouvèl kan moin la fini par konprann nout zournal va sort touzour dsi lordinatèr. Kèl fason ? Mi koné pa ankor, mé sak moin lé sir, sé ke nout konba i kontinyé, é sa sé plito in bon nouvèl... Konm té i di dann tan la roiyoté, “Témoignages” lé mor, mé viv “Témoignages”. Li bouz ankor !

Justin


Kanalreunion.com