Oté

Ti galé-gro galé, galé d’isi, galé déor ! Galé prop galé sal

Justin / 30 novanm 2015

Konm in bonpé d’moun moin la antann parlé rosh Madagaskar. Moin la antann dir i sava fé vni lo rosh dann péi-la pars demoun isi i vé pa i tir lo rosh dann karyèr par koté zot pou fé la dig ansanmn sirtou bann bèl-bèl galé aproshan kat-sink tone… Moin la antann de dir té i fo fé vni bann bèl galé-la, vitman pars talèr i flank in kou d’ra-d’maré épi i palank lo komansman la dig dann lo. Zot i oi inpé l’afèr ?

Solman la somenn dèrnyèr in voyaz galé la sort Madégaskar épi l’ariv La Rényon. Solman, sirpriz-sirpriz, kan tout demoun té i pans in gran kantité bèl kap granite té i sar ariv La Rényon, l’ariv in bann ti-moiyin galé konm sak nana dann karo la tèr nana isi é ké lo moun i apèl sa « andin ». Késtyon bèt ? Pou kosa la di i sa fé vnir bèl-bèl kap isi La Rényon épi la fé vni pti-moiyin galé ? Pou kosa la domann l’otorizasyon pou fé vni bann bèl-bèl kap épi la fé vnir sa ? La tronpé… la konfonn bèl avèk pti sansa demoun la-ba la pèrd z’ot linète ? Moin na poin lo répons, mi vann azot sa konm moin l’ashté..lo pri lo galé !

Solman antansyon nana dé shoz lé bien trakasan. Inn : pou kosa l’antropriz la gingn lo marshé la di èl i inport pa lo rosh é èl i inport. Pou kosa èl la di l’ané 2014 nora tout lo karyèr k’i fo é biensir lé pa disponib ankor. Pou kosa dopi 2013 La bann Didier Robert i koné na poin lo matèryo pou fé la dig é i di pa pèrsone arien… Pou kosa zot i vant azot pou lo transparans z’ot projé alé oir la pa transparan ditou.

Mon dyé ségnèr pou kosa i konfonn ti-galé avèk gro-kap ? Pou kosa i konfonn sir plas avèk in porté ? Pou kosa i konfonn galé d’isi avèk galé d’laba ? Anshèv avèk sa i konfonn galé prop avèk galé sal. La lé ak la !


Kanalreunion.com