Oté

« Ti lanp-ti lanp, gran bobèsh ! »

In kozman pou la rout

Justin / 2 novanm 2016

La lanp ? Toulmoun i koné ! La lanp pétrol ? Tou l’moun i koné. Mé lo bobèsh ? Antansyon sa la pa lamèsh. D’apré diksyonèr Alain Armand, sé lo pti bout tiyo an tol, la mèsh i pass dodan. I ariv ké la lanp lé pti, mé la bobèsh lé gran an rapor avèk la grandèr la lanp… Yèr moin la tonm dsi in radyo pèrkal. In madam té apré anparl demoun i vol kart blé épi i tir ti-larzan firamézir san fé romark azot é èl la di : « ti-lanp ti-lanp, gran bobèsh ». Pou èl sa téi vé dir in pti some plis in pti some, plis in pti some, sa i fé in gro larzan. In pé i di osi sa sé sak ou i réponn kan i domann aou koman ou i lé : ti lanp sé ptit santé, mé gran bobèsh sa i vé dir, kékpar, ou nana la vitalité. I vé dir aou : fyé pa l’aparans. Mi èmré konète plis la-dsi mé pou lo moman sé tout sak moin la trouvé .L’èr-la, mi di azot, ni artrouv pli d’van sipétadyé !


Kanalreunion.com