Oté

Ti-pa ti-pa n’arivé !

Justin / 20 févrié 2010

Mi pans zot toute i ansouvyin sinéma bann moun lé kont la mézon dé sivilizasyon la fé lo zour la klotir le lankète. Lo roi martin Sintandré la fèrm ali dann biro épi la dik son méssaz in sèrtin madam Couapel. Byin antandi, RFO té la pou zoué son rol zarboutan la Droite. Bon ! Plis i shanj, plis lé parèy : Virapoullé sé touzour in kloune, é RFO i kontinyé fé lo payasson pou banna.
Donk, si i fo kroir bann la di-la fé, la MCUR té mor é antéré, vi k’son bann partizan l’avé gingn in galo vèy pa koman. Bann zournal la Droite la bate la min... bann radyo pèrkal la bate tanbour... bann télé ossi la mélé. Té i rès aryink bann z’ankétèr… in sinp formalité, d’apré sak i paré... pou sèrv méssyé préfé déssi in plato, sak i fo pou pa pran lo l’arété d’itilité piblik. Té i rèss aryink sa ! Aryink sa ? Solman, oila, travay séryé i fini par donn in bon rézilta, é rakont la krak, sa i pass pa touzour. La prèv sé ké lo rapor bann l’ankétèr lé favorab la mézon dé sivilizasyon. Lo projé la fé ankor in pa an avan… na ankor d’ote pou fé, é va fini par ariv o-boute. La Rényon va fini par an avoir son gayar mézon dé sivilizasyon épi dé l’inité bann Rényoné. Shomin gran-boi sa lé long, ti-pa ti-pa n’arivé !

 Justin 


Kanalreunion.com