Oté

Tienbo Rényoné ! I fo tienbo nout l’idantité !

Témoignages.re / 10 février 2014

Nana in pé d’tan zot i koné, l’avé désèrtin mo téi falé pa di. Lété konmsi ou té apré komète in krime lèz mazésté kont La Frans. Té i falé di ou lé fransé, in poin sé tou. Alé pa di ou lé rényoné pars, pou in pé, in moun té i pé pa ète rényoné. nou té i pé pa di nout péi an parlann La rényon pars, pou désèrtin, La Rényon té pa in péi… Parl pa non pli listoir La Rényon, pars pou inpé La Rényon la poin d’ot listoir ké listoir d’Frans. nout kiltir té arienk folklor, nout lang kréol rényoné in patoi sinpatik. Sa lété vré, dann tan, mé zordi l’opinyon i suiv pi in bob konmsa. Tout sak nou té i pé pa di, zordi ni pé di é la poin pèrsone pou déklar la guèr... mèm si désèrtin la pa bouzé zordi par rapor zot l’opinyon dann pasé, é i pans touzour parèy.

In progré ? in rotour an aryèr ? in ropliman ? Pans sak zot i vé mé fransh vérité bann rényoné la fine shanj zot poinn vizé par rapor zot mèm. Dann bann shanté ou i pé antann lo bann mo avan té défandi di... Yèr matin moin té apré ékout in shanson in ségatyé i apèl Willy. In ga i shant bien, in bon kadans é an pliské sa zoli paroli zoli paroli mé paroli pou la lite. Moin lé sir é sèrtin na in bonpé d’moun isi i rotrouv azot dann sak li shant. Moin lé sir in bonpé d’moun i san azot myé kan zot i antann bann parol konmsa. Biensir mi sava pa di tout lo bann parol biensir, pars sak i gingn i vo myé i ashèt lo sédé ; sak na poin la moné i fo zot i ékout sa avèk kamarad. Mé i fo ékouté pars sa i fé travay la tète. Donk lé bien ! donk mi aprouv !

Solman mi domann k’ i sava in pé pli loin dann nout rovandikasyon. La kiltir, ok ! l’idantité ok ! La lang,ok ! Listoir,ok ! Mé si ni vé égzisté vréman konm pèp sanm pou moin i fo nout péi i dévlop. I fo nout agrikiltir i marsh, ni dévlop la pèsh, ni dévlop lindistri, nout ladministrasyon lé bien roganizé, ni trouv travay pou done nout zénès. Pars si na poin lo dévlopman, kèl kalité lidantité va rès anou si ni ariv gard ali pou nou ? In lidantité dan la mizèr, dann lo sou-dévlopman, dizon in lidantité batu. Mé lidantité la-dan ? Kosa li pé ansèrv anou ? Li pé ansèrv anou pou ranfors nout patriotism dann lékonomi. Donk si ni tienbo kont tousala, plis in pouvoir i roprézant anou pou vréman, l’èr-la, nou nora lo droi shant avèk Willy : "Tienbo, tienbo rényoné, tienbo nout rényonèzté, tienbo nout lidantité !"

Justin


Kanalreunion.com