Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Accueil > Chroniques > Oté

Tomate gaté i gate lo panyé !

vendredi 1er juillet 2011

Matante Zélida la ékrir Justin :
Mon shèr nové, mon spès salté,
Alor, astèr zot i krétik mésyé Vergoz. Ala ke rant bann gosh, nana dolo dann gaz. Si mi konpran bien, l’advèrsèr in pé, sé pi l’UMP, sé lo parti sosyalis. M’a dir aou in n’afèr : Boudikont, mi èm bien so mésyé Vergoz. Pou kèl rézon ? Dabor inn, pars bann rouj-de-fon i èm pa li. Dézyèm rézon : kan z’afèr lété séryé, mésyé Vergoz la touzour trouv in tik-tak pou li asosyé avèk la droite, pou bar la route bann z’avantiryé. Lé vré pou zordi, té vré pou yèr, akoz pa domin ? Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi konpran bien pou kosa, konm ou i di ou-mèm, ou i èm bien mésyé Vergoz konm politik. Solman, mi fé romark aou, bann zéléktèr i aprésyé pa tro le ga ; Bann zéléktèr Sint-Roz la fine anvoy ali dingué kèk foi. Zéléksyon réjyonal, sé lo boug la fé lo pli mové rézilta pou parti sosyalis. In n’ot afèr ankor, konm di lo kont, si ni oi pyédboi i pansh, ni koné pa touzour kèl koté li sava tonbé ;
Kosa mi vé dir par-la ? Bin, vi koné la droite lé riskab pèrd son majorité dann Sénat, pars a-fors pèrd bann zéléksyon, son nonm gran zéléktèr la diminyé, é lé posib la gosh i kapote la droite moi d’séktanm. Mazine in kou ! Si sé in mazorité fèb. Dizon dé-troi voi. Si mésyé Vergoz épi inn-dé mové tèt konm li, soi i vote avèk la droite (konm zordi li fé dann Konsèy réjyonal !), soi pou in rézon konm li nana parfoi, i abstien ; L’èr-la la droite i gard son majorité dann Sénat, i vote lo bidzé Sarkozy pou 2012, épi i fé tout sort mové kou pandab konmsa.
Epi, konm di lo patoi, in tomate gaté i gate lo panyé, é mi asir aou, sa in tomate gaté pou vréman, so boug-la !

 Justin 


Un message, un commentaire ?

signaler contenu


Facebook Twitter Linkedin Google plus