Oté

Tou va tré bien madam la markiz !

Justin / 21 janvier 2013

Zot i koné na in dépité La Rényon, madam Orphé, la fé son bilan pars sa i fé sis moi èl lé député. Bin figuir azot, èl la trouv son bilan favorab. Solon èl gouvèrman la bien travayé é F. Hollande, d’apré sak èl i di, la fine fé avans in bonpé son program. Mi trouv sa étonan ! Ala in prézidan i sava travay pandan sinkan. Ala in gouvèrnman, li osi, li nana son tan pou li travay. Ala bann député, nana sinkan dovan zot pou fé avans lo péi. L’èr-la, apré sis moi, solon èl la fine bien avansé !

Dann kèl sans ? Dann sans la dékolonizasyon ? Mé bann député, pétète, i pans nou la fine dévir lo do avèk la kolonizasyon dopi lontan. Donk, la pa dsa zot i anparl ! Dann sans la prodiktivité bann travay demoun ? Na in spès lakor, mé la CGT épi Force ouvriyèr la pa signé é lo sindika la signé, sé lo mèm ké la done son lakor pou k’i raz la pint nout rotrèt. La pa i bon sign ! Désèrtin i di mèm sa in régrésyon dann Droi di travay. Arzout èk sa pandan son kanpagn lo prézidan la zamé di l’avé in problèm la prodiktivité dann bannn z’antropriz fransèz. Donk si sa la avansé, lé pa bon pou bann travayèr é tout fason té pa dann son program... Armète la dsi, la profit lo vote lo bidzé pou fé in sort réform z’inpo, pou fé pèy in pé plis bann rish. Ziska moin la trouv sa in bon n’afèr, solman Konsèy konstitisyonèl la rant la-dan konm in débrousayèz dann in karo gran zèrb : la koupé, la koupé, la koupé é rézilta plis in milyar larzan la disparèt. Ni sar ar pa pli loin pars in nouvo l’évènman l’arivé.

Lakèl ? La guèr bien sir. Sa té pa in n’afèr prévi, é sa la pa in n’afèr i fé avèk lo trou dann posh. I koné mèm pa, ziska mintnan konbien la guèr-la, i sava kout bann Fransé. I koné pa non pli dsi kèl bidzé i sava tir sa. Moin noré pansé madam la député, noré profite l’okazion pou di èl lé in pé trakasé, kan mèm pa bokou in pti morso, konm i di dann shanson lontan. Non ! Èl lé pa trakasé ditou. Èl na kèr klèr.... Tou va tré bien madam la markiz ?

NB : In zour mi pans, pétète in pé va komans réfléshi in pé an profondèr dsi sak zot i fé. Sar pliské tan kant mèm.

Justin


Kanalreunion.com