Oté

Toulmoun i koné sa in bob ! Toulmoun i koné sa i marsh pa konmsa !

Témoignages.re / 19 mars 2011

La lang la poin lo zo ! Sa in patoi bien koni dann nout péi. Lé vré, avèk la lang i gingn di tout z’afèr : sak lé vré, épi sak lé fo. I pé fé promès, épi apré i tienbo pa. I pé fé toute kalité kritikasyon, mèm si sa i arpoz pa déssi arien. Dann in kanpagn éléktoral, la lang na poin lo frin, li done toute son kapasité !

Moin la lir dann zournal yèr, bann kont-parti Roland Robert épi Marcelle Puy, vi k’zot program sé in sakosh vide, olèrk dévlop in bon program, zot la pass zot tan pou kritik lo mèr La Possession. La di, li ménas lo pèrsonèl, étsétéra-étsétéra la ké lo ra. Zot i kritik galman lo program Konsèy zénéral épi zot i promète shanj program. Solman, dann zot pti program, zot i amontr zot i koné pa travay Konsèy zénéral i fé. Zot i promète dé shoz la fine fé, zot i promète ossi sak Konsèy zénéral i pé pa fé, pars li la poin la konpétans pou fé sa. Sa in labitid, koméla, La Rényon !

Roland Robert la mète banna o défi arpète dé shoz mantèr konm sak zot i di dépi la kanpagn la komansé, sansa li sar blizé fé in n’afèr d’loi. Aprésa, li di in kékshoz pli grav ankor : li domann kossa dann program Konsèy zénéral zordi, bann la droite i vé kassé. Pars lé blizé fé sak lé pli itil, donk si i tir dé shoz la-dan, sé dmoun frazil i sa gingn ankor lo kou. Pars bann moun la droite i parl pa domann l’État ranbours plis troi-san-sinkant milyon l’éro li doi pou fé plis. Donk, konm di lo kont, sak zot i vé, sé fé plis avèk moins larzan. Toulmoun i koné sa in bob. Toulmoun i koné sa i marsh pa konmsa !

NB : Gouvèrnman i doi Konsèy zénéral 350 milion l’ero é li vé pa rann, é la droite i réklam pa non pli... vi k’inn konm l’ote lé kopin konm koshon.

 Justin 


Kanalreunion.com