Oté

Toultan ké l’arbit la pankor siflé…

Justin / 22 zwiyé 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi pans z’ot figir la di asiz in pé dsi zistoir La grèce la . Mi pans zot i doi konprann z’ot ane té inn bourik épi z’ot gabyé kosto in moun té i fé solman la gonflète. Pars, kant mèm, dégonflé konmsa apré an avoir amontr son misk ébin mi trouv lé pa for. Ti ash i koup gro boi, sa lé vré, mé défoi lo pti ash i ariv a kasé. Akoz li la fé z’afèr konmsa ? Pou kosa li la défyé, soi dizan, tout l’érop pou finalman kapitilé. Fé l’for sé inn, mé ète for, sé in n’ot zistoir. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, kozman konmsa, sa i étone pa moin d’ou. Pou kosa ? Pars ou la rogard la télé ou ? Ou la vi tout in bann zournalis apré mète la grèce an akizasyon. In pé dmoun La Rényon osi dan ta, alé oir zot i koné pa, sanm pou moin, kèl koté lo péi lé déviré. Touléka, pou moin, sa i amontr lo vré vizaz d’in l’orop pla-vant dovan lo kapitalis finansyé. Sa i mont lo solidarité sé in fo solidarité, in sistèm pou ésploit bann pèp. Lo mank solidarité, lo mank dé konpasyon, sa té pa ékri dann la shart l’Erop ! Mé sa té sirman dann in zakor kashé rant bann rish é bann ti kolonté i koné pa sa. Lé pa for touléka oir so bann l’anprofitèr . Tok ! Pran sa pou ou.

Matant Zélida la ré ponn ali :

Ou i anprète larzan ébin i fo rann in poin sé tou ; la pa bézoin in bak plis vinn-sink pou konprann in n’afèr konmsa. Tok ! Pran sa pou ou !

Justin la robis aèl :

Tardra viendra matant, nora in poin final a tousa é, lo gagnan ni koné pa ankor ki ksé. Antansion in pé, si zot lé pa pli akomodan zot lé riskab pèrd z’ot larzan artifisyèl non réèl. Toultan ké l’arbit la pankor siflé, lo match la pankor fini. Tok ! Pran sa pou ou !


Kanalreunion.com