Lakey lo sit > Chroniques > Oté
Tourism ? ’Tou va tré vbyin, madam la markiz !’
zedi 23 séptanm 2010, sanm
Mi sort lir dann zournal bann shif promyé sémès déssi la késtyonn tourism.Tan myé lé byin kontan ! Tan pi lé mal kontan ! Toute fason, sa lé konmsa é pa otroman ! Mé sa lé konmsa mèm !
In sèrtin sobatkoz dann la kanpagn zéléksyon
Mi rapèl in sèrtin sobatkoz, dann la kanpagn zéléksyon rézyonal. Mi souvyin koman Didier Robert, Ti-bus premyé, épi lo dénomé Vergoz la atak l’Alyans déssi son bilan dann tourism. Mi rapèl lé dé konplis la pa mank gaskone lo bilan La Rényon, par raporte lo bilan l’Il Maurice, Seychelles é koatéra. Mi souvyin Paul Vergès té i di, tourism dann l’il Maurice épi in pé partou, lété dan l’malizé. Pou La Rényon, an kontrèr, lé shoz té i marsh in pé myé. Mé bann gaskonèr la kontinyé gaskoné.
Baguète mazik i fé pa mirak !
Mé dépi tan-la, Didier Robert lé prézidan. Li la fé promès. Li la mèm di li nana in plan mirakilé pou mète lo tourism an orbite. Mé, lé a romarké lé shoz i aranz pa konm avèk baguète mazik. É, bann koush-a-tèr dovan lo roi, i pé kriy viktoir, mé sète-la la pa la ankor la. Mèm, in pé lé blizé kontante azot in pti pour-san, par isi, in pti pour-san par la-ba. So kou issi, sé avèk sa ké zot i fé zot dimansh. Zot i pé shante. "Tou va tré byin madam la markiz !". Mé ziska kansa ?
Justin
