Oté

Tourn in pé out lang sèt foi dann out boush !

Justin / 21 out 2013

Matant Zélida la ékrir Justin :
Mon shèr nové, mon spès salté, rouj-de-fon dovan l’éternité,
Si mi tronp pa, sé ou l’apré ékri toultan l’ilétrism sé in tar pou La Rényon. Alé pa tro vit, pars ala kosa mi sort lir dann in zournal : si lé vré La Rényon lé déyèr la métropol pou l’ilétrism, nana kant mèm désèrtin niyans i fo aporté. Inn, La Rényon lé pa tro an rotar par rapor désèrtin départman la métropol. Dé, pou bann moins diz-uit-an, si nana 27,5 pour san bann jèn ilétré, na kant mèm plis trant pour san dan la Martinik, plis trann-troi pour san dan la Gouadloup, 48 pour san dan la Guyane, é près soisant kinz pour san dann Mayot. Alor, siouplé, arèt rabès anou, arèt krétik La Rényon, pars a bien rogardé, nout sitiasyon lé pa si mové ké sa dsi la késtyonn konèt lir épi ékrir. Mi oi pa ou, mé mi pans out figuir l’apré asir li la. Tok ! Pran sa pou toi ! 

Justin la fé pou répons :
Mon vyé matant k’i koz touzour la boush rouvèr,
Mi trouv lé éstra sak ou i di. Myé k’sa i pé pa ! Pars a bien kalkilé, tout marmay i sava l’ékol La Rényon. Nana in kargézon amontrèr avèk in bon formasyon, l’ékol pou toulmoun, matèryèl pou gaté... Rézilta : ou lé ziska kontan nana plis in jèn diz-uit-an dsi kat i koné pa vréman bien lir épi ékrir ; ou i di, d’ot péi l’Outre-mèr na pli mové rézilta ké nou. Lé bon, mé kèl fyèrté, kèl kontantman ni pé tir la-dan ? Matant, lo malèr désèrtin i fé pa lo bonèr lé zot, ou i kroi pa ?
Arzout èk sa, ou i konpar anou avèk la Frans, mé l’ékol la Frans lé pa bien klasé dan l’Erop, lé mèm mal klasé... bien fay par rapor bann péi konm la Finland, konm Danmark, konm l’Island épi d’ot ankor. Ou i pans sa i rolèv in péi la invant l’ansègnman piblik. Ou i kroi pa lé nésésèr fé in bon l’égzamin konsyans ? 
Astèr ou i parl Mayot : dakor, Mayot in départman fransé, mé dopi dé zour. Arzout èk sa, kosa la Frans la fé pou son koloni dopi sépa konbienn syèk ? Ou i pans pa la Répiblik nana dé shoz pou li roproshé dan so ka-la ?
Alor, siouplé, tourn in pé out lang sèt foi dan out boush avann kozé. Mi pans sa lé pli préférab. Tok ! Pran sa pou ou !

NB : Moin la pa parl la lang zordi, mé noré pou dir pou nou konm pou tout péi l’Outre-mèr ; pou an avoir in bon l’instriksyon, sanm pou moin, i fo baz dsi la lang matèrnèl bann z’anfan. Prinsip-la lé sinp, mé tro konpliké pou désèrtin tèt do zèf i désid pou nou, a nout plas, é i koné myé ké nou sak lé bon pou nou.

 Justin 


Kanalreunion.com