Oté

Tout lé dann mèm bato, mé in pé an promyèr, in pé dan la kal

Justin / 7 zwin 2013

Si zot la fé éstaz dan l’antropriz, moin lé sir zot la antann lo fraz : "Patron konm travayèr ou sinonsa zanploiyé, nou lé dsi l’mèm bato !". Lé dan l’intéré toulmoun si lé shoz i marsh bien, si na bon komann, épi si bann produi i vann bien. Mi pans zot la fine antann in n’afèr konm sa, é pa arienk in foi. Pétèt mèm zot lé dakor avèk sa. Pars lé vré, i fo lantropriz i marsh bien. Lé vré, i fo li dégaj in marj profi par rapor la pli-vali li aport.
Lé vré tousa, mé momandoné, ou i vé, ou i vé pa, mé i fo ou i louk in pé lo partaz bann frui di travay. Boudikont, toulmoun i konpran bien i fo pa konfonn lo shif d’afèr avèk lo rovni lantropriz : la pa bézoin sort dann gran lékol pou konprann in n’afèr konm sa. Toulmoun i konpran galman na zinpo pou péyé, na bann trèt pou ranboursé... Aprésa, i oi si lantropriz la gagn larzan, si li la pa gagné, é si li la gagné, momandoné i fo fé in partaz : i fo in par pou linvèstisman, i fo in par pou pèy bann zaksyonèr, i fo in par pou pèy la transpirasyon bann travayèr.

Koméla, lo partaz i fé pa an misouk. Lo bilan, sa i ékri dann zournal. Kont-randi l’asanblé zénéral, sa lé piblik. Zot lé dakor èk moin ? Sé pou sa i apèrsoi in pé i gonf zot pla é in pé i sèr sintir, la kolèr i pé monté. L’otro zour, pou magazin Karfour Sint-Sizane, bann travayèr la lir dann zournal lantropriz té i fé in bénéfis dé milyon l’éro. L’èr-la zot la di, ni gagn trépé é lantropriz i fé gro-gro bénéfis, donk i fo ni réklam. Sa i éspas zordi pou la CILAM : la CILAM i fé bénéfis é bann travayèr i oi pa la koulèr, donk zot i réklam. I paré la CILAM i sort fane rant son zaksyonèr dé milyon l’éro. Sa i fé in takon larzan sa !

Mé kan bann travayèr i réklam, lo patron, pou komansé, i sézi tribinal tèlman zot i pans tribinal lé zot koté. Tout fason, Kréol i èm pa alé tribinal : ou i koné pa kosa ou lé kapab an avoir la-dan. Lantropriz, pou son par, i anvoy son lavoka, inn ou sinonsa dé suivan son moiyin, é li pans fé pèr lo bann travayèr. Astèr, in sinp rovandikasyon i vien konm in guèr sivil. Bann médya i éksit lopinyon. In pé i anparl lintéré La Rényon. Tou zis si i di pa bann travayèr l’apré fé koul lo bato. Pars, konm mi di an-o-la, nou lé dsi lo mèm bato ! Mé in pé lé an promyèr klas, in pé lé dan la kal konm zot zansèt dann tan lontan. Sa la pa lo mèm zafèr !

 Justin 


Kanalreunion.com