Oté

Tout nana san rouj, sof sak nana san blé !

Justin / 3 avril 2015

Moin la toujour antann dir alon méfyé in moun rish sirtou si ou sé in pti kolon, pars in rish i konpran pa bien bann ti-kolon. Sé konm si ou i pran in profésèr la touzour gingn vin-sir-vin lékol, li kon pran pa in marmay i gingn fèb note. Parèy si ou i pran in moun nana la réisite dann son biznès é pou li sak i réisi pa, i mérite pa la réisit. Dann la politik, mi pans sé lo mèm z’afèr, si lo bann moun sé in bann promyé d’la klas, bann sak i vien apré i intérès pa zot..

La plipar d’tan, banna i konfonn la zistis épi la solidarité, avèk in spès sharité. Zot i kroi, bann ti kolon, la pa bézoin in bon travay é in pti kontra sar sifizan pou zot. Pir ké sa, konm zot lé bon dann domènn la manipilasyon mantal zot i fé rant dann kopko bann ti kolon, in pti kontra lé asé bon pou zot, pa pou lo désidèr. Kan ou i kriy l’égalité, la zistis, la solidarité, zot i konpran ou i di la sharité é si la sharité lé pa bon pou ou, l’èr-la ramas la réprésyon.

Nou na in bann gouvèrnman, in bann prézidann – si ou prézidann la, zot i pans zot i fé parti d’ lo san blé la sosyété, lo z’élite si zot i vé, é bann ti kolon i apartien bann dèrnyé nasyon konm poulayé dann sinéma lontan. Alor, si désèrtin, konm nout parti kominis i parl l’égalité, la solidarité é la zistis an vré,, soi bann san blé i pans ni kroi pa sak ni di, soi zot i pans nou lé pa solidèr avèk bann z’élite, donk i fo fiziy anou.… San krétiké, kan ni di toulmoun lé égal, tou l’moun nana san rouj, zot i réponn anou, dann tréfon zot kèr : » Tout na san rouj ! oui ! Mé in pé na san blé, obli pa ! »


Kanalreunion.com